Risgo sa karne

Ang National Meat Inspection Service (NMIS) dunay dakong problema: Kakuwang og mga kawani. May ikaduha pa: Katapolan. Ug ikatulo: Posibleng pangurakot. Nadawat nako ang mahasol nga mga kasayuran mahitungod sa NMIS human sa pag-ulbo sa kontrobersiya sa pagbaha sa imported nga karneng baboy sa kamerkadohan.

Niangkon si Dr. Alvin Leal sa NMIS nga 13 ray ilang mga kawani alang sa tibuok Central Visayas. Tungod sa kadaghan sa mga ihawan ug mga planta sa karne sa tibuok rehiyon, napugos sila pag-deputize sa local government units. Apan may kasaligang kasayuran kong nakuha nga ang taga NMIS mismo wa magtuman sa ilang trabaho. Bugti sa kuwartang gibundak sa mapahimuslanong mga magpapatigayon.

* * *

Pipila ka meat inspectors sa NMIS gipasanginlan nga nagbilin og mga porma sa mga ihawan nga pirma nang daan. Wa sila magtagad pagtambong sa aktuwal nga ihaw ni sa pagsusi sa kaluwas sa mga karne. May mga higayon pa gani nga masumiter ang mga porma sa NMIS nga way numero sa gidaghanon sa karne kay nataligam-an na sa mga tagduma sa mga ihawan.

Di lang katapolan maoy hinungdan ning raket sa pipila ka meat inspectors. Gitugyan ang ilang mga gimbuhaton ngadto sa mga tagduma nga ila untang bantayan bugti sa binuwan nga ilang gidawat nga, nakatag-an ka, mas dako pa kay sa ilang suholan.

* * *

Ang implikasyon ini mao nga di na tang kaseguro sa kalidad ug kaluwas sa mga karne nga gipamaligya sa atong kamerkadohan ug giproseso sa mga planta. Kay bisan ang selyo sa NMIS di na man diay garantiya nga tinuod gyong nasusi ang mga karne.

Laing implikasyon mao nga ang NMIS wa gyoy klarong ideya sa gidaghanon sa mga karne nga nahimo ug nakonsumo dinhi sa Sugbo ug sa rehiyon. Nga posibleng mao say nahitabo sa ubang bahin sa Pilipinas. Mao diay tingali nga wa gyud silang katabang sa nasudnong kagamhanan pagtino sa tukmang gidaghanon sa imported nga mga karne nga katugotan sa way pagpatay sa lokal nga industriya.

* * *

Nisaad si Dr. Leal sa pagsusi sa kasayuran nga akong nahipos. Hinaot nga iyang tinud-on. Kay si Leal mismo nagpakita og makahasol nga mga timaan nga gisayun-sayon rang iyang trabaho. Wa kahatag og mga numero dihang gipangutana sa lokal nga mga opisyal pila na ka tonelada ang nakompra nga mga karne gikan sa Tsina ug ubang kanasuran.

Wa sab siyay ideya unsaon pagpreserbar sa mga mamaligyaay sa kamerkadohan, nga way mga freezer, ang imported nga mga karne. Labaw nang wa magtagad unsay mahitabo sa imported nga mga karne nga di mahalin sa pila na ka adlaw human napagawas sa mga planta. Gipasa hinuon ngadto sa LGUs ang pagsusi sa kaluwas sa imported nga mga karneng ilang gidam-ok sa kamerkadohan.

* * *

Email: [email protected]