Bag-ong MCIAA

Karong si Engr. Nigel Paul Villarete na gyo’y general manager sa Mactan-Cebu International Airport Authority (MCIAA), nabantang na nga bisag unsaon pa diay niyag pangisog, di na matuman ni Gobernador Gwen Garcia ang tanan niyang gusto. Napamatud-an nga temporaryo ra diay ang iyang kalamposan pagbabag sa tinguha ni Presidente Noynoy Aquino pagpalingkod sa bag-ong liderato sa MCIAA.

Ang gikinahanglan mao ra diay’ng pagpangunay ni Transportation Secretary Jose de Jesus pagtigom sa bag-ong MCIAA board. Ug sama sa gihimo ni kanhi senador John Osmena niadtong naglisod sab si Atty. Alfonso Alerre pagpuli ni Heneral Benito Diamos sa MCIAA, sa kaulohan di sa Sugbo gipahigayon ang tinuyong tigom.

* * *

Ning paglingkod ni Villarete sa MCIAA, maputol na gyod ang makauuwaw nga kasaysayan sa MCIAA paglapas sa mga lagda sa Civil Service Commission (CSC). Kay lahi nilang Heneral Danilo Francia ug sa ubang nag-una niya, si Villarete dunay career executive service (CES) eligibility.

Hinaot nga kahatagan na sab ni Villarete og kinutoban ang naandan nang pag-usab-usab sa mga lagda sa MCIAA pagpahaom sa bisan unsang gusto sa mga nagduma. Hinaot nga mahunong na sab ang paghimong gatasan sa MCIAA sa mga opisyal nga nagpasiugda og mga transaksiyon pagpaburot sa pribado nilang mga panudlanan.

* * *

Hinaot ma-imbestigar sa labing daling panahon ang tinuod nga hinungdan nganong wa mahuman ang pagtukod sa administration building sa MCIAA, human nakagasto og P65 milyones sa P120 milyones nga gahin. Tinuod ba ang pasangil sa whistleblower nga si Cris Saavedra nga ang luna nga nahimutangan sa building wa panag-iyaha sa MCIAA? Hinaot nga matarung na pagsusi sa kapaspas nga naggusbat sa P50 milyones nga MIP (Most Important Person) building.

Daghan ug dagko ang mga gimbuhaton nga nagpaabot ni Villarete sa MCIAA. Nga mahimong makapahubag sa mga mata sa mga opisyal sa gobyerno ug pribadong sektor. Kay seguro gyod nga wa sila’y tarung kinatulgan sa mosunod nga mga adlaw.

* * *

Maong karon pa lang mangahas na ko pagsugyot ni kanhi Tourism director Dawnie Roa sa pag-uli na sa P500,000 nga pabawon nga iyang nadawat gikan sa karaang MCIAA board. Kay gawas nga kuwestiyonable ang legalidad sa iyang paglingkod sa board, bisan sa kamandoan sa MCIAA charter nga ang kalihim ug luyuluyong kalihim ra sa DOT ang makalingkod, gi-disallow na sa Commission on Audit (COA) ang samang benepisyo nga gihatag sa niretiro sab nga luyuluyong kalihim sa Department of Transportation and Communications (DOTC) niadto.

Ang iya rang bugtong dag-anan mao nga matakdan sa kahakog sa ilang mga gipulihan ang bag-ong mga sakop sa board. Ug magpabaga gihapon pag-awhag sa Korte Suprema sa pagbasura sa makiangayon nga pagdeklarar sa COA nga nakalapas sa lagda batok sa double compensation ang transaksiyon.

* * *

Email:[email protected]