Biyahe ni Noynoy

Gipamatud-an ni Pres. Noynoy Aquino nga di kinahanglan nga daghanon pag-ayo ang mga sakop sa iyang delegasyon, mag-charter og ayroplano, mopuyo sa labing luho nga hotel ug magkumbira sa labing mahalon nga kan-anan aron hatagan siya og importansiya sa iyang labing unang pagduaw sa Estados Unidos. Human nabulilyaso sa pagduma sa duguong hostage crisis sa Quirino Grandstand, gipahinumdoman tang Aquino sa dako niyang kalainan ni kanhi presidente Gloria Arroyo.

Gipahibawo sa Malakanyang nga ang P25 milyones nga gasto sa usa ka semana nga biyahe ni Aquino gamay ra kaayo kon itandi sa kapin sa P60 milyones nga kasagarang naggasto ni Arroyo sa iyang mga biyahe sa ubang mas gagmayng mga nasud. Di kinahanglan nga mangugat ang palasyo pagkumbinser sa mga magbubuhis.

* * *

Upat ra ka sakop sa gabinete ang kuyog ni Aquino. Way bisan usa ka kongresista ni senador nga nakasaling-it. Di diay tinuod ang pangangkon nga di angayng magtihik-tihik sa gasto sa mga biyahe aron pagkumbinser sa langyawng mga magpapatigayon nga mahinungdanon sila ug busa angayng mobubo sa ilang puhonan dinhi. Di diay kinahanglan nga mag-junket aaron seryusuhon sa ubang kanasuran.

Wa siya magtangkil og tigpamaba. Igo rang gi-tweet ang mga panghitabo sa iyang biyahe pinaagi sa twitter.com/govph. Wa say molalis sa iyang pagtudlo ni kanhi senador Mar Roxas, ang naparot niyang kandidato pagka bise presidente, isip magtatambag sa iyang biyahe.

* * *

Basaha ang mosunod ug di kong kabasol kon matakdan ka sa nitumaw nga paglaom nga bisan sa pasiunang mga sipyat mahimong may maayo gyong kausaban nga mapatuman ang bag-ong pamunoan:

· Inay mopuyo sa luho kaayo nga Waldorf-Astoria sa New York, nga maoy kinaham nga pinuy-anan ni Arroyo, sa ubang mga pangu sa nagkalainlaing kanasuran ug sa labing adunahan nga mga magpapatigayon, gipili ni Aquino ang mas barato nga Sofitel; ug

· Inay mogasto og P1 milyon sa Le Cirque samang Arroyo, nikaon lang og burger sa In-N-Out Restaurant sa Holding Area sa San Francisco International Airport sa wa pa mosakay og ayroplano paingon sa New York.

* * *

Mahimong sukdon ang kalamposan sa labing unang langyawng biyahe ni Aquino sa gidak-on sa bag-ong puhonan ug mga hinabang nga iyang madani ug mas lig-ong pakighigalaay sa ubang kanasuran nga iyang mamugna. Masukod sang iyang kaandam sa kalidad sa iyang pakigtagbo nilang US President Barack Obama ug ubang mga pangu sa kanasuran nga magtapok sa United Nations.

Apan ang mas gamhanan mensahe nga napadangat sa nagpadayong biyahe ni Aquino mao nga di siya sama sa iyang gipulihan nga way pupanagana nga niwaldas sa buhis sa katawhan. Hinaot nga ang iyang kamaikugon ug kamapanagan-on paggamit sa nasudnong panudlanan di lang kutob sa pagdaginot. Kon dili mosangpot sa mas lapad ug mas malungtaron nga makiangayong kausaban.

* * *

Email:[email protected].