Kampanya batok kabit

Maayo kay mipasalig na si Land Transportation Franchising and Regulatory Board (LTFRB-7) regional director Benjamin Go paghimo og kampanya batok niining mga sakyanan nga anha ra iparking sa karsada panahon sa gabii.

Akong angkonon nga diha'y higayon nga nagkasumpaki mi si direktor Go tungod kay ang iyang baruganan mao nga dili siya moaksyon sa mga operator sa maong mga sakyanan nga anha ra sa karsada pabuntagan kon walay reklamo.

Ang akong baruganan mao nga bisan walay reklamo mahimo nako nga pangitaan og paagi pinaagi sa pagsusi kon ang grahe sa maong mga operator og public utility vehicles anaa pa ba gihapon.

Dihang didto pa ako magpuyo sa laing barangay, dunay silingan namo nga nagpalit og passenger jeepney. Nakakuha siya og prangkisa kay duna man g'yud siya'y grahe. Apan sa ngadto-ngadto, ang iyang grahe gihimo nga madyongan.

Ang iyang PUJ diha na lang sa karsada giparking ug pabuntagan nga ang ubang mga sakyanan maglisod na hinoon sa pag-agi.

Sigurado ko nga ingon usab niini ang gihimo sa ubang mga tag-iya og public utility vehicles.

Nagtoo man gani ko nga ang ubang kawani sa LTFRB mihatag lang og prangkisa nga wala tan-awa kon tinuod ba nga may grahe ang mga aplikante.

Husto g'yud kaayo ang lakang ni direktor Go. Pinaagi sa pagsusi kon ang usa ka operator duna bay grahe sa iyang mga sakyanan, mahibaw-an ang binuang.

Dili imposible ang pagtoo ni Go nga ang ubang mga tag-iya'g taxi ug PUJs igo lang "mikabit" sa prangkisa sa ubang mga operator.

Dunay mga PUV operator diha nga gihulagway nga suod sa mga opisyal sa LTFRB ug dali ra nga makakuha og prangkisa.

Kadtong uban nga maglisud ug dili gayud mahatagan og prangkisa, aw mobayad ra ngadto sa mga operators aron makabit ang ilang mga units.

Ang paghimo niini, magpirmahay sila og Deed of Sale aron ipatoo kunohay nga ang sakyanan nabaligya na ngadto sa mga franchise holders.

Ang tumong nila sa paghimo-himo og Deed of Sales aron nga ang sakyanan sa nagpakabit mahatagan og prangkisa kay kon makita nga iya kini niadtong nahatagan na og prangkisa, tulin pa sa manatad nga maaprobahan.

 Nasurpresa man gud si direktor Go kay pag-review niya sa lista sa mga PUV operators, duna gani'y usa nga nahatagan og 75 ka prangkisa.

Mao kini ang usa sa among himoan og inspection ugma. Tan-awon namo ni direktor Go kon ang maong operator duna bay lapad kaayo nga grahe sa iyang mga sakyanan.

Kon ang sakyanan niya alang ra sa lima ka units, basihanan na kini nga nagpakabit siya og mga sakyanan. Sagad sa mga tag-iya'g sakyanan nga kabit ra, walay grahe, ug anaa ra sa karsada iparking.

Suheto kaayo si direktor Go niini. Anaa siya magpuyo nianang taas kaayong tower building ibabaw sa bungtod sa barangay Apas ug klaro niya nga daghang sakyanan nga anaa ra sa karsada.

Klaro kaayo sa iyang nahimutangan ang mga green nga sakyanan sa Mariners nga anha ra iparking sa karsada paingon sa GMA complex.

Kon dunay sunog nga mahitabo sa maong dapit ang mga bombero maglisud pag-agi kay gamay na lang ang kabahin sa karsada nga nahabilin tungod sa illegal parking.

Nakabantay ko nga diha sa P. del Rosario Extention daghan usab nga mga PUJs nga anaa ra giparking daplin sa karsada.

Atong pagakpakan kon si direktor Go magmalampuson paghimo'g aksyon batok sa mga sakyanan nga anha ra sa karsada iparking sa gabii.

Daghan na kaayong mga opisyal sa LTFRB nga wala makahimo og lakang niini.

*  *  *

Kadtong mga ngilngig nga abogado magpanuko gayud tinuod pagdawat sa tanyag nga mag-direktor sa Cebu City Medical Center.

Kon mag-private practice ang maong mga doktor pilo-piloon og makadaghan ang kantidad nga ilang matigum kon itandi sa sweldo sa direktor sa CCMC.

Misugyot gani ko ni Mayor Michael Rama kon mahimo ba nga usbawan ang sweldo sa CCMC chief, apan mora'g dili mahimo.

Dagko g'yud tinuod og kita ang mga doktor kon mag-private practice. Tiaw mo nga ang higala nako nga doktor nga human sa inadlaw niyang trabaho, mo-side line pa g'yud og consultation sa gabii.

Tag kapin sa 100 ka pasyente ang maglinya kay barato ra man ang iyang pabayad, unya maayo pa nga mo-diagnose, labaw sa tanan manghatag pa og mga sampol nga tambal.

Ang tanang pasyente magbitbit g'yud og sampol inig-gawas sa iyang klinik. Dili lang nako ilhon kay dili siya gusto.

*  *  *

Email: [email protected]