Sidewalk vendors

Ang pagpatuman sa giingong "One Side Vending" sa atong mga aseras dili gayud lisud kana kon ang atong mga opisyal dunay kaisog.

Giklaro na g'yud kagahapon ni Mayor Michael Rama nga ang giingon nila nga one-side vending wala magpasabot nga ang entero aseras hingpit na nga mawad-an og sidewalk vendors.

Pananglit sa Colon Street duha man ka aseras nga anaa sa matag kilid sa karsada, duna diay gihapo'y mga tindera nga tugotan nila nga makapaninda, apan dili na anha sa kilid sa karsada.

Ang mga tindera adto na magbutang sa ilang tindahan tupad sa bungbong sa mga building nga mag-atubang sa karsada.

Gipasabot ko ni kanhi konsehal Sylvan "Jack" Jakosalem nga karon maoy chairman sa City Traffic Operations Management (CITOM) nga mao kini ang buot ipasabot sa "one side vending" nga gitataw ni Rama kagahapon.

Sa ato pa, dili gayud hingpit nga hapsay ang paglakaw sa mga tawo diha sa aseras kay daghan man gihapong mga sidewalk vendors. Apan ang gamay'ng konswelo mao nga mas mohapsay lang og gamay ang daplin sa karsada.

Ang problema niini sa mga vendors kon mosugot ba ang mga tindera nga ang mga sidewalk vendors anha mobutang sa ilang baligya kilid sa ilang building.

Tan-aw nako, mosamot nga ang mga tag-iya og building mangayo na g'yud og abang gikan sa mga sidewalk vendors kay kon dili sila mohatag, asa man mosugot ang maong mga tag-iya'g establishment.

Unya, wala nay mga payong ug atop-atop sa tindahan nga tugotan nga matukod diha sa aseras. Ambot og mapatuman ba g'yud kaha kini sa bag-ong hepe sa Squatters Prevention Encroachment Elimination Division (Speed).

Nagduda ko nga maglisod niini pagpatuman si Noel "Nonoy" Artes, apan hatagan nato siya og higayon nga mapamatud-an ang iyang abilidad.

Ayaw na ninyo huwata nga mapupos ang unang 100 ka adlaw sa termino ni Rama sa katungdanan usa ninyo sugdi pagpatuman ang gimando nga "one side vending."

Kon mapakyas si Rama paghapsay sa atong aseras, panilngan nato siya kon hain na ang iyang gipasiatab nga atol sa iyang administrasyon "Hapsayon niya ang gubot, ug tul-iron ang hiwi."

Ang katawhan gud dili na ganahan nga mosubay sa aseras kay puno ug samok kaayo tungod sa mga sidewalk vendors.

Maayo unta og tinud-on nila sa Speed nga dili na tugotan ang mga vendors nga mobilin sa ilang mga karomata diha sa aseras.

Kay kon ang katawhan adto na molakaw sa karsada, sigurado nga samok kaayo ang atong mga karsada sama sa sitwasyon diha sa Colon ug Osmeña Boulevard.

* * *

Hangtod karon, si Belinda Navasquez, ang acting Human Resource Department head sa Cebu City Hall, pakyas pagpatuman sa angay'ng pagahimoon nga mao ang pagpugos sa mga kawani nga magsul-ob gayud og identification cards.

Nabantayan nako nga daghan pa gihapong mga kawani nga nagsuroy-suroy sa City Hall nga wala magsul-ob og uniporme ingon man walay ID.

Dunay uban nga nagsul-ob tuod og ID nga ang sling gisul-ob sa ilang liog apan ang ID gibutang sa bulsa. Tarong ba gud kana? Unsa may katuyoan nga magsul-ob gayud og ID ang mga kawani sa City Hall?

Dili na man tingali kana angay pa nga ibatbat nato pag-ayo. Nganong dili man gayud mag-uniporme kining ubang kawani? Unsa, mauwaw mo nga mailhan nga mga kawani sa City Hall?

Kon duna may mga kawani sa City Hall nga walay klaro nga trabaho atol sa administrasyon ni kanhi mayor Tomas Osmeña, wala kini mahanaw o padayon sila nga anaa gihapon, napun-an pa gani, atol sa administrasyon ni mayor Mike Rama.

Hagiton nako si mayor Rama nga "tul-iron niya ang hiwi" kay usa ka hiwi ug salawayon alang sa usa ka opisyal ang pagpiyong lang sa mga mata ug wala magtan-aw nga nausik lang ang kwarta sa katawhan.

* * *

Bilib kaayo ko. Niadtong Dominggo sa hapon, nasundan nako didto sa Gorordo Avenue ang duha ka porlon nga gikargahan og duha ka lungon paingon pa sa simbahan.

Ang unang porlon ako lang gilabyan, apan ang ikaduha, ako g'yud nga gihunongan. Abi ninyo og ngano?

Pagtungod g'yud nako sa ikaduha nga porlon, maoy nasabak sa akong pandungog ang kusog nga tukar gikan sa porlon. Sanglit hilig man ko sa videoke sinati nako nga ang tugtog intru kini sa sikat nga kanta ni John Lennon.

Mihunong ko og gipaabot ang pag-agi sa porlon, wala ko masayop. Jealous Guy ang kanta. Ingon ana ang maayo, dili na kadtong Ave Maria kay makahilak ta.

* * *

Email: [email protected].