Hala agwantaha

Nanghasi na usab kuno si Joavan, ang sinagop ni Talisay City Mayor Socrates Fernandez.

Gipul-an na kaayo ko nga naminaw sa ingon niini nga balita uy nga maglambigit Joavan.

Makaingon ko nga angay ra usab tingali nga panghasion ang taga Talisay kay kon dili pa tingali mayor ang iyang "ama-ama," dili gyud tingali siya maghinambog.

Kay gibotohan man gihapon pagbalik sa katawhan sa Talisay ang amahan ni Joavan isip mayor, aw masabot nato nga bilib sila ni Soc nga pirmi ra nga molaban sa iyang anak.

Na hala, agwantaha na ninyo. Total, kana si Joavan anaa ra man usab manghasi sa inyong lugar. Gituyo man usab na niya nga anha sa Talisay maghinambog kay mahadlok man kaniya ang mga polis diha.

Diri bitaw sa Cebu City nga gikataho nga nagdala siya og armas ug nanghasi sa guwardiya sa usa ka apartment, wala man gyud siya kawanga sa mga sakop sa Special Weapon and Tactics (Swat) team.

Unsaon, pulpol man kaayo ang ubang polis diha sa Talisay nga wala makapitol sa dili maayong binuhatan ni Joavan. Hadlok mo ni Soc? Gidayeg nako si Soc nga usa ka maayong amahan, apan pagka mayor wala gyud.

* * *

Napakyas gyud ko sa akong tinguha nga si Ginang Margot Osmeña nga karon Number 2 nga konsehal diha sa south district mao unta ang modumala sa Cebu City Medical Center.

Gusto gyud unta ko nga si Madam Margot maoy mag-chair sa committee on health and hospital services apan iya kining gibalibaran ang maong komitiba.

Committee on Tourism diha sa City Council ang gigunitan ni Madam Margot. Gikauyonan nga si Councilor-elect Ronald Cuenco maoy mag-chairman sa committee on health and hospital services.

Awhagon na lang nato si Mayor-elect Michael Rama nga ayuhon gyud niya ang pagdumala sa CCMC. Kon matan-aw nga maayong hulipan ang direktor sa ospital, ayaw pagpanuko, ipakita ang imong political will.

Ako usab nga gikalipay ang pagkatudlo ni Konsehal Ritchie Osmeña isip bag-ong chairman sa committee on traffic management kay daghan og mga maayong plano si Ritchie sa pagpalambo sa traffic management.

Si Konsehal Edgardo Labella usab mao na ang modumala sa committee on agriculture. Sigurado ko nga ikalipay na kini sa mga mag-uuma nga aduna nay konsehal nga tinuoray'ng moserbisyo kanila.

* * *

Dili ko motoo nga makabantay ang kadagkoan sa Department of Trade and Industry (DTI) batok sa mga magpapatigayon nga mopausbaw pag-ayo sa mga presyo sa ilang school supplies.

Makita nako nga wala man gani'y "unod" ang report nga ilang gipadangat sa Cebu City Council nga miawhag kanila nga siguradohon nga walay moabuso pagpasaka sa mga presyo sa ilang baligya niining nagsingabot nga pagbukas sa klase.

Wala man gani kamo makapahunong sa mga kawani sa insurance companies ug sa maghimo og promotion diha sa mga mall nga kusog kaayo mangilad pinaagi sa pagpatoo nga makadaug ka apan dili diay.

Gising mo uy taga DTI.

* * *

Usa ka basurero nga si Manong Angelo napugos intawon pagrisgo sa iyang kinabuhi pinaagi sa pagtarok og payag ibabaw sa Mahiga Creek kay unsaon nga wala may laing katarokan.

Hangtod karon ang kagamhanan sa dakbayan sa Sugbo wala pa g'yoy gihimo. Si Gerry Marquez nga consultant sa urban poor maoy gitahasan ni mayor Tomas Osmeña pagsuta sa sitwasyon sa maong mga namuyo diha sa sapa, wala pay report.

Kanus-a pa man kita moaksyon, unya na ba kon may kinabuhi na nga makalas tungod sa atong pagpasagad?

* * *

May mitug-an kanako nga nag-operate na man diay ang bag-ong buwangan diha sa barangay Inayawan.

Ngano god tawon nga gitugotan na man nga maka-operate ang maong buwangan nga wala pa man kini mahatagi og prangkisa sa konseho sa dakbayan?

Palihug mga konsehal tan-awa ninyo kini nga isyu. Grabe na man usab ang inyong pagpabor sa tag-iya sa buwangan uy.

Klaro baya kaayo nga gipangitaan gyud ninyo'g paagi nga mahatagan kini og prangkisa pinaagi sa pag-amendar sa ordinansa aron madugangan ang gitugot nga gidaghanon sa buwangan nga mag-operate dinhi sa dakbayan.

Law-ay man gud kaayo nga wala pa gani mahatagi og prangkisa sa dakbayan nagsugod na sila og operate.