Maleksyon gyud mo

Nindot nga dunay mireklamo kabahin sa mga "Yellow Taxi" nga nag-operate sa Mactan Airport nga mapik-ap gihapon og pasahero sa pagpaingon nila balik sa airport gikan nga naghatod og pasahero.

Wala masayod ang kadaghanan nga kining maong mga "Yellow Taxi" wala tuguti nga makapasakay og pasahero balik sa airport kay ang ilang bayad niadtong misakay kanila gikan sa airport ug nagpahatod sa ilang destinasyon doble na man kay sa mga ordinaryo nga taxi.

Tag P30 ang flagdown sa mga ordinaryo nga taksi, pero sa Yellow Taxi tag P70. Sa ordinaryo nga taksi, tag P2.50 ang patak, sa Yellow taksi tag P4.          Gituyo kini kay aron nga dili na "manglubag" ang mga drayber sa ilang pasahero.

Kay masabot man nga hasta ang pagbalik sa Yellow taxi paingon sa airport gibayran na sa ilang pasahero, dili na sila angay'ng mopasakay pa. Apan duna gyud mga drayber nga mapahimuslanon.

Tungod sa reklamo nga nadawat sa konseho sa dakbayan sa Sugbo, hisgotan kining maong isyu sa usa nila ka sesyon karong buwana.

Awhagon nako ang publiko nga ayaw gyud mo pagsakay og Yellow Taxi padulong sa airport, kay gawas nga mahal, kuwestyonable na kini nga biyahe.

* * *

Gimandoan na sa Ombudsman ang mga opisyal sa barangay San Roque dinhi sa dakbayan sa Sugbo nga tubagon ang reklamo nga gipasaka batok kanila sa kauban ra nila nga konsehal.

Unya gawas nga gimandoan sila pagtubag sa reklamo, gi-upgrade na usab ang kaso ngadto na sa full-blown criminal ug administrative investigation aron mahibaw-an kon tinuod ba nga dunay nakabulsa kanila og kuwarta sa barangay.

Ambot og unsaon kaha pagtubag sa mga opisyal sa San Roque sa reklamo ni Konsehal Lidiore Miranda. Sayonan ka nga gibutang sa dokumento sa barangay nga mitambong sa ilang kalihukan ang mga patay.

Usa sa patay nga giingong mitambong mao si kanhi Kapitan Telesforo Rabaya nga nga namatay kaniadto pang 2004. Gibutang pa sa dukomento nga ang namatay nga kapitan apil sa mikaon sa "snacks and food" nga giandam alang sa nanambong. Kataw-anan.

Angay'ng paspasan sa Ombudsman ang pagsusi niining maong reklamo ni Konsehal Miranda kay nagtoo ko nga duna pay ubang barangay nga naghimo niini apan wala lang mahibaw-i kay wala may mitug-an.

Gawas nga dunay patay nga giapil, daghan pa sa mga tawo kang kansang ngalan giapil sa kunohay mitambong sa kalihokan sa mga "disabled persons" ang mipirma og affidavit nga wala gyud sila masayod ug wala makaapil.

Hangtod karon, si Kapitan Roger Ruizo wala pay gihimo nga aksyon sa iyang kawani sa barangay nga matud pa niya maoy nag-andam sa dukomento.

Makaduda baya ang katawhan Kapitan Ruizo nga ang wala nimo pag-aksyon sa reklamo posibleng apil ka sa binuang.

Sama ra kana sa kapitan niadto sa barangay Lorega-San Miguel ug ubang mga opisyal nga wala gyud mohimo'g aksyon sa binuang sa barangay secretary ug laing kawani.

Basi sa lagda sa Local Government Code, ang mga kapitan sa barangay gihatagan og gahum pagdisiplina sa ilang mga appointed employees nga makahimo og sala. Nganong dili man ninyo disiplinahon? Hadlok mo og motug-an sila?

* * *

Hangtod karon, kadtong drayber sa motor nga nakadam-ag sa akong sakyanan - si Rogelio Casicas - wala pa gyud motubag sa iyang obligasyon.

Gipaagi ko lang dinhi ang pagpahinumdom kaniya nga duna siya'y obligasyon kay ambot hain dapit ang balay niadtong tawhana.

 Mao kana ang problema sa mga tawo nga bisan og walay lisensya, walay kasinatian pag-drive og sakyanan, apan magpatuga-tuga. Unya kon makasala dili dayon motubag sa ilang obligasyon.

Bisan pa og kompleto sa dukomento, sama sa insurance ang iyang motor, apan ang insurance dili mobayad sa kadaut nga iyang nahimo sa akong sakyanan kay wala man siya'y lisensya. Kakutloan kini og pagtulon-an sa uban nga kon wala kay lisensya magkaproblema ka gyud kon maaksidente. Mas maayo nga mentras wala pa ko makapadangat niini sa hukmanan imo na nga sulbaron ang imong problema Mr. Casicas.

Kon ang kaso moabot na sa korte mas dako pa gyud unya ang imong problema. Kadtong mga nagpakaila ni Mr. Casicas ipalihog pagtug-an kaniya.

Tungod kay wala pa man maatiman ang akong sakyanan nga naguba, nagsakay-sakay lang tawon ko og motor karong panahona.