Check and balance

Nakadawat ko’g reklamo nga dunay mga barangay kapitan nga magpadiki-diki paghatag og barangay clearance ngadto sa ilang mga lumolupyo kun kini dumadapig sa ilang mga kontra sa politika.

Aw, ingon g’yod niana ang mahitabo ilabi na kun ang mga hingtungdan walay kasinatian kon unsay angay’ng himoon.

Mao kana nga miawhag g’yod ko kaninyo nga ayaw kaayo usiki ang inyong oras sa pagtan-aw og salida sa telebisyon ug pagbasa og basahon nga walay hinungdan.

Kon mibasa pa kamo og mga balita sa mantalaan unya naminaw sa mga news and public affairs program sa mga radyo, nasayod unta kamo unsay tukma nga himoon kon makasugat kamo og ingon niana nga problema.

Ako isip sakop sa media, kadaghan na ako makasinati nga dunay mga opisyal sa kagamhanan nga magpadiki-diki paghatag kanako og mga dukomento nga akong pangayoon.

Apan kay nabantayan man nila nga suheto ko sa balaod nga makapaapiki kanila kun ipadayon nila ang ilang kabuang, wala sila’y mahimo gawas sa paghatag na lang.

Tambag nako sa mga mireklamo nga himoi og complaint ang maong mga kapitan didto sa Ombudsman, ayaw kahadlok. Tan-awon nato og dili ba sila magdali-dali’g pabuhat kaninyo sa dukomento.

Ang pagka supporter sa kaatbang nga kandidato o partido dili kini rason nga ang kapitan dili na moisyu og barangay certificate. Pugsanay diay ang pagpasuporta og kandidato?

* * *

Mas malipay ko kon dunay “check and balance” diha sa konseho sa dakbayan. Ang gipasabot niini nga angay’ng duna g’yoy mga konsehal gikan sa oposisyon nga modaug.

Nindot ang gibutyag ni congressional aspirant Jonathan “Atan” Guardo nga lima ngadto sa unom sa ilang mga kandidato sa oposisyon pagka konsehal sa north district ang modaug, ug mga tulo usab sa south.

Kon matuman kining maong panagna ni Guardo, duna nay “check and balance” ang konseho sa dakbayan.

Alang nako, dunay daghang mga gasto sa dakbayan nga angay g’yod unta nga sutaon pag-ayo apan wala kini himoa kay pulos man kauban sa partido ang naglingkod karon sa konseho.

Sa han-ay hinoon karon sa mga kandidato sa oposisyon diha sa north district mora’g dunay pipila kanila nga may paglaum nga modaug kon ang ilang kontra sa administrasyon magpaluya-luya.

* * *

Hangtod karon, wala pa gayod tagda sa mga sakop sa Squatters Prevention Encroachment Elimination Division (SPEED), ang mga tindera ug imahen sa mga santos nga anaa na mamaligya sa aseras sa D. Jakosalem.

Alang ni Major Vicente Mercado, ayaw god tiaw-tiawi kining mga abusadong tindera. Kun tinud-on nimo sila paghimo’g kampanya, sigurado ko nga mapitol kining ilang pagka-abusado.

Natan-aw man god nako nga duna pa gihapo’y mga tindera nga anaa nag-display og mga baligya ug nagbutang og lingkoranan sa karsada. Awhag nako ni Major Mercado nga aron pag-justify sa “extension” sa imong serbisyo, trabaho g’yod.

Ang mga sakyanan god nga gikan sa Magallanes nga mo-disilya paingon sa D. Jakosalem maghuot kay migamay na man ang karsada tungod sa mga baligya nga anaa na gibutang sa karsada.

* * *

Usa ka polis nga suking tigbasa sa Birador, mitug-an nga dihang nadestino pa siya kaniadtong Mobile Patrol Group, dunay conductor og PUJ nga iyang gidakop kay misuway og suborno human niya gidakop ang iyang drayber.

Diha kini mahitabo sa eskena Osmeña Boulevard ug Colon. Nahibulong ang higala nako nga polis kun ngano nga bisan giunsa nila pag-siren, ang drayber sa PUJ dili man g’yod molarga gikan sa eskena.

Dayon miduol ang conductor nga mitunol og kuwarta. Mao diay, nasaypan sila nga mao ang mga “crew” nga hataganan nila’g suborno sa laing patrol car sa Citom.

Pastilan, mao diay nga panahon sa gabii dili g’yod masumpo ang grabeng kahuot sa sakyanan diha sa eskena Colon, Osmeña Boulevard ilabi na sa dapit sa “Manila Bank” kay magpasuborno diay ang traffic enforcer.

Syaro, wala gayod makabantay niini ang hepe sa Cebu City traffic group ug ang nagdumala sa Citom?

Kining maong isyu maisip usab nga dakong hagit alang ni Konsehal Augusto Pe Jr. nga maoy chairman sa committee on peace and order sa City Council.