Dili g’yod maayo ang gihimo ni Senador Panfilo Lacson nga pagtinalawan karong panahona pinaagi sa pagtago-tago gikan sa mga tawo nga nangita kaniya human siya malutsi og warrant of arrest.
Tungod sa gihimo ni Lacson daghang mga tawo ang mosaway kaniya. Dili man god makatuyok ang ligid sa katarungan kon dili pa ma-custody sa hukmanan ang mga akusado.
Tan-awa ra god kadto si kanhi presidente Ferdinand Marcos nagpapriso lang apan misukol sa kaso. Resulta napa-abswelto niya ang iyang kaugalingon gikan sa giatubang niya nga asunto.
Ang pagsibat ni Lacson ngadto sa laing nasud ug ang dili pag-atubang sa kaso nga gipasaka batok kaniya maghatag og ideya sa uban nga sad-an g’yod diay siya.
Mao nga alang nako, mas labing maayo nga atubangon ra ni Lacson ang iyang kaso. Kuyaw kaayo kon madakpan na hinoon siya sa iyang pagtago-tago didto sa laing nasud.
Kon dunay basihanan si Lacson sa iyang pamahayag nga bakak ang pasangil nga nalambigit siya pagpatay ni Bobby Dacer ug Corbito, angay niya kini nga pamatud-an diha sa korte.
* * *
Unsa kaha’y pakulo sa mga nasudnong kandidato karong adlawa sa pagsugod na sa “actual campaign period.”
Tan-aw nako mora’g walay dakung impak kay dugay na sila nga mihimo’g kampanya human nga ang Korte Suprema mideklarar nga dili na illegal ang paghimo og “early campaigning.”
Mga kauban ko sa media nakurat pagkakita nga samtang ang kampanya sa mga lokal nga kandidato unya pa magsugod sa Marso 26, apan nakakita na sila og daghang propaganda materials. Wala g’yod ta’y mahimo ani.
Kon magsugod na ang campaign period, anha pa nga ang Comelec mo-regulate sa pagbutang og mga propaganda materials sa mga kandidato diin ipalimit na nila ang gidak-on ug kon asa kini ibutang.
Apan kay nasinati na man nato nga hapit ang tanang kandidato g’yod dili motuman sa mga lagda, walay bisan usa kanila nga moreklamo gawas lang niadtong mga pildehonon nga buot lang mangamong.
Nasayod na kita nga kon walay moreklamo, ang Comelec dili usab moaksyon.
* * *
Basi sa labing ulahi nga survey mius-os na g’yod ang pagkainila ni Senador Benigno “Noynoy” Aquino ug misaka kuno si Senador Manny Villar.
Silang duha si Villar ug Noynoy dunay mga giatubang nga isyu. Si Villar kabahin sa C5 road extention project nga ang karsada giingong gituyo pagpaliko ngadto sa property ni Villar aron makahatag og binepisyo kaniya.
Si Noynoy usab nag-atubang og kontrobersyal nga isyu kay isip usa sa mga tag-iya sa Hacienda Luisita nganong wala man siya mangusog nga ang kayutaan iapod-apod sa mga saop.
Ang argumento sa uban mao nga si Gilbert “Gibo” Teodoro wala tuoy kontrobersyal nga isyu, apan gilantaw sa uban nga kon siya modaug, daku gihapon kaayo og gahum si Presidente Arroyo sa iyang administrasyon.
Mao nga kadtong nasuko ni GMA, sigurado ko nga sila dili mobotar ni Gibo.
Alang nako, ang angay’ng pilion ug padag-on sa eleksyon mao kadtong mga tawo nga dili hambugero, dili tigpakaaron-ingnon aron lang nga sila botohan sa katawhan.
Dunay uban nga miingon nga kuwang sila’g pagsalig ni Noynoy kay sa kadugay na niya nga nahimong kongresista ug senador wala sila makabantay og mga ilado nga balaod nga iyang nahimo.
Alang nako, usa sa angay’ng basihan sa katawhan sa pagpili og presidente ug bise presidente nga modumala sa atong nasud mao kadtong mga kandidato nga naglantaw usab paghatag og pagtagad sa atong environment.
Kay kon dili kita magpakabana sa atong kalikupan, moabot ang higayon nga ang hangin nga atong pagahanggapon, makahilo na kanato o makadaut sa atong panglawas.
Mao kini ang rason nga midayeg ko ni Senador Loren Legarda kay siya maoy author sa Republic Act 9003, ang Ecological Solid Waste Management Act, apan subo lang kay wala usab kini hingpit nga gipatuman sa mga opisyal sa kagamhanan.
Kon ang mga lokal nga opisyal mopatuman lang g’yod unta sa balaod, gawas nga limpyo ang atong palibot, presko pa g’yod ang hangin nga atong pagahanggapon.