Nagbagolbol pag-ayo ang katawhan nga mopauli sa lainlaing dapit sa kalungsuran sa habagatan ug kasadpang bahin sa Sugbo kay wala dayon pasudli ni Byron Garcia og mga pasahero ang South Bus Terminal waiting area kaniadtong Sabado.
Si Byron nga security consultant ni Governor Gwendolyn Garcia mipasabot nga tungod sa kadaghan sa mga tawo dili na kini masulod sa terminal waiting area kay ang maong air-conditioned area, mosulod lang og 750 ka tawo.
Ang reporter sa DYLA nga si Dario Gil nga didto sulod sa baseyo nga air-conditioned nga passenger’s waiting area giduol ni Byron ug gipangutana kon unsay ikasulti niya sa iyang pamaagi.
Apan nasuko man si Byron dihang giingnan sa reporter nga nalooy siya sa gatusan ka pasahero nga gisingot kaayo nga didto ra sa gawas nagpaabot kay wala pasudli ang waiting area.
Gihulga ni Byron ang reporter nga pagawason gikan sa air-conditioned waiting area kay misimpatiya man siya sa mga pasahero.
Husto si Byron nga kinahanglang kontrolahon ang gidaghanon sa mga tawo nga mosulod sa air-conditioned nga passengers waiting area.
Apan ang wala g’yod niya pagpasulod og mga pasahero didto sa air-conditioned area sayop nga paagi. Mahimo man nga 750 lang g’yod ka tawo ang pasudlon niya sa waiting area.
Dayon, iphon kon pila ka tawo ang mogawas sa terminal luwan sa mga bus, ug mao usab kini ang gidaghanon sa mga pasahero nga tugotan nga makasulod sa waiting area.
Dili ba sayon ra unta kaayo kon kini pa ang gihimo nimo Mr. Byron? Nabantayan sa publiko nga init ka kaayo og ulo Mr. Byron nga dali ra kaayong masuko.
Ang pagpangalagad baya sa kagamhanan Mr. Byron wala magpasabot nga kamo na g’yod maoy mga hawod. Wala usab kini magpasabot nga hawod ang media.
Kay dia man kita sa usa ka demokrasya nga pangagamhanan, dili ka angay’ng masuko Mr. Byron kon dunay dili makagusto sa imong pamaagi.
* * *
Mirisi g’yod niadtong mga tawo nga wala na marehistro dihang mitak-op ang Comelec pagpangrehistro kaniadtong Sabado sa tungang gabii.
Taas kaayo ang panahon nga gihatag kanila apan unsay ilang gihimo? Wala sila magtagad ug diha na magpanikad nga moparehistro pag-abot na sa katapusang mga adlaw.
Mao nga pagka alas singko sa hapon niadtong Sabado, giputol na sa Comelec ang taas kaayo nga kutay sa mga tawo nga gustong moparehistro.
Kay kon tugotan sila nga molinya lang gihapon ug moabot ang alas 12, mohunong man gihapon ang Comelec pagpangrehistro ug dili lang gihapon sila maatiman.
Mao na, kadtong wala na marehistro leksyon ninyo kini sa sunod higayon.
* * *
Sa politika, nalipay ko kay si Margot nga asawa ni Mayor Tomas Osmeña midawat na sa tanyag nga siya molansar sa pagka konsehal sa dakbayan.
Sigurado nga modaug g’yod si Margot. Kuyaw pa gani nga mag No. 1. Pustahanay ba ta?
Midayeg kaayo ko ni Madam Margot kay gusto ko nga siya ang modumala sa Committee on Health Services. Dili man kinahanglan nga doktor g’yod ang modumala nga chairman sa maong komitiba.
Ang tinuoray’ng pangalagad maoy bugtong sekreto nga magmalampuson ka sa imong tahas bisan og dili ka doktor nga modumala sa Committee on Health.
Sinati kaayo ko ni Madam Margot nga sinsero g’yod sa iyang pag-alagad, ngadto sa kabataan ug sa mga tawo nga magkinahanglan og pag-atiman sa ilang panglawas.
Hinoon, kon moduol ka karon ni Madam Margot nga mangayo ka’g kwarta, dili ko makapasalig nga hatagan ka kay wala man siya’y budget niini, apan sigurado ko nga iya kang tabangan.
Congrats daan Madam Margot!
* * *
Ang mga lider sa oposisyon dinhi sa dakbayan ako g’yod nga gitambagan nga mokuha og lig-on nga kandidato aron dili sila mangaparot.
Kinahanglang kuhaon nila sa line-up sama nila ni Atty. Aven Piramide, Atty. Fritz Quiñanola ug Joel Garganera sa north district.
Nindot man god kaayo ang konseho nga dunay oposisyon kay mahashas g’yod ang mga proyekto ug maminosan ang pagduda nga dunay binuang.
Apan kon ang oposisyon dili makatanyag og maayo nga kandidato, posible nga ang katawhan mapugos na lang pagpili sa mga kandidato nga sakop ra sa Bando Osmeña Pundok-Kauswagan.
Kinahanglan g’yod nga karong eleksyona, atong tan-awon kinsa kadtong mga kandidato nga sinsero sa katungdanan aron maoy ibutang nato sa puwesto.