Hapit mamantala

Segun sa di kasaligang mga tinubdan, busa tuohi lang kon wa nay laing kapilian, ang mosunod mao ang mga pahibawo sa pipila ka haligi sa Artsidyosesis sa Sugbo nga diriyot gyod, diriyot lang, mapagawas sa opisyal nilang pamantalaan, ang Bag-ong Lungsoranon:

• Pahibawo sa Tanang Sakop sa Media: Di tanan nga pamahayag ni Msgr. Achilles Dakay naggikan ni Arsobispo Ricardo Kardinal Vidal. Di sa tanan nga higayon nga nagsilbi si Dakay nga tigpamaba sa Kardinal. Kasagaran nipagawas lang sa iyang kaugalingong panahom.

• Pahibawo sa Tanang mga Botanteng Katoliko: Di tanan nga kawsa ni Dr. Rene Josef Bullecer may bendisyon ni Arsobispo Ricardo Kardinal Vidal. Ni sa kinabag-an sa kaparian. May mga kawsa si Bullecer nga siya ray nahibawo. Mao nga ang kapakyas sa pipila niya ka kawsa, apil nang iyang kandidatura sa party-list elections, di angay nga isipon nga kapildehan sab sa Simbahan.

* * *

• Pagpangayo og Pagsabot sa mga Sugbuanon: Palihug ayaw hatagi og politikanhong kahulogan ang paghulga ni Arsobispo Ricardo Kardinal Vidal pagbakwi sa iyang suporta ni Senador Noynoy Aquino tungod sa Reproductive Health Bill. Kay wa man gyod siya sukad makapahibawo nga nipaluyo siya ni Noynoy.

• Pasidaan sa mga Deboto sa Lindogon, Sibonga: Way labot si Arsobispo Ricardo Kardinal Vidal sa patigayon sa humot nga lana, wishing bell ug color-coded nga mga kandila sa mga monghe. Apan di siyang kabadlong sa makauuwaw nga panguwarta kay nagpailad man sab mong tanan inay mopasaka og pormal nga reklamo ngadto niya.

* * *

• Pahibawo sa Tanang Babaye nga mga Tinun-an nga Mangumpisal: Makamisa ug makapakumpisal na usab si Padre Ben Ejares. Gidasig kamo sa pagkumpisal niya uban sa inyong mga ginikanan o kaubanan sa klase. Kon mahimo, palihug ayaw pagtapad niya og lingkod samtang mangumpisal. Ayaw hatagi og malisya ang iyang mga sulti kay guwatsinanggo siya. Ug bantayi ang strap sa inyong bra.

• Pasidaan sa Tanang 17 Anyos nga Babaye nga mga Kaabag sa mga Parokya: Di angay nga kahadlokan ang pagka destino ni Padre Jose "Joey" Belcina sa Minglanilla. Ang pagtudlo og mga pari uban niya sa usa ka Team Ministry dunay balaanon nga katuyoan. Ipangaliya nato nga mas mahinumdoman unta niya ang mga pagtulon-an sa Tumalog, Oslob kay sa iyang kasinatian sa Maslog, Danao.

* * *

• Pasidaan sa mga Pari: Gipasaylo ni Arsobispo Ricardo Kardinal Vidal si Padre Oscar Ornopia, bisan sa iyang pagkumpisal nga duha na ang iyang anak, kay bililhon kamong tanan alang sa Simbahan. Ayaw hinuon kasayop pagsunod niya kay… (basaha ang mosunod nga…)

• Pakitabang sa mga Parokyano sa Minglanilla: Palihug apil mo og bantay kon para asa ang ikaduhang koleksiyon, kon duna man, sa mga misa ni Padre Oscar Ornopia.

* * *

Email:[email protected]