Mauwaw ta uy

Nasayran na nako nganong paspas kaayo nga motubo ang tubig diri sa downtown area, ilabi na sa dalan V. Gullas kon mobunok na ang kusog nga uwan.

Ang angay’ng buhaton mao nga palawman kining sapa nga anaa mag-agi kilid sa Gaisano Main nga milagbas sa karsada D. Jakosalem. Kini maoy nakamugna og problema.

Pagbunok sa kusug nga uwan adtong Sabado, didto ko sa V. Gullas luyo nga bahin sa Gaisano Main. Wala na ko makalabang paingon sa among opisina sa kakusog nga uwan og taud-taud, mitubo ang tubig.

Nakita nako nga ang tubig nagbugwak-bugwak nga daw tinubdan gikan sa drainage system. Usa ka maintenance personnel sa maong tindahan ang mipasabot kon ngano nga ingon niadto ang talan-awon.

Ang drainage system gitumong unta aron nga ang tubig nga gikan sa kanal, moagas paingon sa sapa ug mabanlas paingon sa dagat. Apan balit-ad ang nahitabo.

Inay nga ang tubig gikan sa kanal suyopon unta sa drainage system, ang tubig nga gikan sa sapa misulod na hinoon agi sa maong drainage manhole ug daw sa nahimong tinubdan paingon sa karsada.

Ang problema mao kini. Mabaw na kaayo ang sapa nga akong gihisgutan. Ambot kon palawman usab ang maong sapa, basin og mabaw na kaayo ang bukana niini didto sa dagat.

Kon lawom lang unta ang maong sapa, ang tubig nga gikan sa kinaibabwan nga anha mosubay sa barangay Kamagayan lahos na sa dalan Junquera, sayon ra niya nga suyopon og ibuga sa dagat.

Maayo unta kon matan-aw kining bahina sa mga sakop sa Department of Engineering and Public Works (DEPW) aron nga maiban-ibanan ang problema nato sa lunop-baha.

* * *

Didto ko sa Land Transportation Office-7 kagahapon sa udto kay naghatud ko sa lisensya sa mga drayber nga akong nadakpan gikan kaniadtong Huwebes.

Kay naabtan man ko sa pagbunok sa uwan, nakahigayon ko pakighinabi sa mga drayber nga nagpa-renew unta sa ilang lisensya ug sa pipila nga molukat sa ilang mga driver’s license.

Nasayran nako nga nagsige man diay gihapon ang “fixers” diha sa LTO. Kadtong nahinabi nako, wala dayon makapa-renew kay miuntol ang iyang lisensya kay duna pay pending violations.

Giangkon sa tag-iya nga gipakuot ra niya ang iyang lisensya sa usa ka “fixer” dihang kini nadakpan kaniadto. Usa ka laing drayber nga nadakpan usab ang lisensya ug naminaw kanamo, nahigmata sa iyang sayop.

Midali-dali sa pag-adto sa “fixer” nga iyang gipaasikaso sa pagkuha sa iyang lisensya ug gibawi ang kwarta nga iyang gihatag. Maayo kay nakahuna-huna siya nga bayran na lang g’yod ang multa sa tinarong.

Wala tingali masayod niini si higalang Aden Belza nga nagpadayon pa sa pag-operate ang mga “fixers” diha sa LTO.

Aw, hinuon kining maong mga drayber nga hilig kaayo mogamit og fixer, magmahay ra gihapon mo sa kauwahian. Sigurado man g’yod nga bisan og makuha ninyo ang inyong lisensya, apan nagpabilin ang bayranan.

* * *

Usa ka kawani sa Office of the President nga ania gidestino sa dakbayan sa Sugbo isip “eyes and ears” nakakita og dili maayong talan-awon kaniadtong miaging Dominggo sa gabii.

Gidili ang pag-parking sa mga bus nga magpaabot og pasahero diha sa Natalio Bacalso Avenue atbang sa Cebu South Bus terminal.

Apan mga alas nuweve sa gabii, dunay tulo ka bus nga mihunong sa maong dapit kay naghuwat og mga pasahero. Gawas kini sa terminal ug daplin sa karsada.

Ang kawani sa Malacañang nakabantay nga dunay sakyanan sa CITOM, (pugngan lang usa nato ang body number) nga taud-taud miabot ug mihunong.

Usa ka dispatcher ang miduol sa patrol vehicle sa CITOM nga nagdala og payong, dayon tunol og kwarta. Unsa man to, bayad sa wala pagdakop sa maong mga drayber nga naghuwat og pasahero sa maong dapit?

Sa gibalik-balik na nako, ang mga drayber dili na motahud kaninyo nga mga traffic enforcers kon ingon niana ang inyong binuhatan.

Kon kinsa’y mga opisyal sa CITOM nga gusto nga moimbestigar ani, andam nga mohatag kaninyo og inpormasyon ang higala nako nga kawani sa Malacañang.

Ambot og ganahan ba kaha si Arnel Tancinco nga moimbestigar niining maong isyu. Pero ang mga tarong nga opisyal dili makatugot og mga binuang sa ilang mga sakop.

* * *

Email: [email protected]