Labani ang imong sakop Arnel

Nakadawat ko og report nga dunay CITOM traffic enforcer nga midakop og usa ka motorista nga nakahimo og kalapasan sa balaud sa tukmang pagmaneho og sakyanan, mao na hinuon ang gidakop kay polis ang driver nga iyang nadakpan.

Mora'g wala kaayo kini mabutyag kay gililong lang tingali ngadto sa mga sakop sa media. Ang akong higala sa CITOM maoy nagpahibalo kanako sa pait nga kasinatian ni traffic enforcer Mark Anthony Melendres.

Angay'ng tagdon kining maong isyu ug si Arnel Tancinco nga maoy gitugyanan pagdumala sa CITOM angay'ng dili mopalabay lang niining maong punto.

Nganong si enforcer Melendres na man hinuon ang dakpon sa polis nga mao man gani kini ang nakahimo og kalapasan sa balaud sa tukmang pagmaneho basi sa report nga miabot nako?

Kini si Melendres anaa madestino sa eskena Leon Kilat ug P. del Rosario ug niadtong miaging semana, may gisita siya nga drayber. Matud pa nga usa diay ka polis ang drayber ug siya na hinuon ang buot dakpon.

Kinahanglan nga kining maong isyu dad-on sa kadagkoan sa kapolisan aron nga kon masuta nga miabuso kadtong polis, nga giingong daku og ranggo, mapahamtangan siya og silot.

Pananglit usab si enforcer Melendres ang nakahimo og sayop, mahimoan usab siya og susama nga silot. Awhagon nako si Arnel Tancinco nga imbestigahon niya kini dili kay tago-tagoan lang ang isyu.

Tiaw mo, dihang nanawag ko kagahapon sa operator sa CITOM daghan man diay ang wala masayod. Kuyaw ug si Tancinco wala masayod ani, pero imposible kaayo.

Kon ang usa ka opisyal god dili mopakita og paglaban sa iyang mga sakop kon makasugat kini og kontrobersyal nga isyu, bisan og wala makahimo og sala, makamugna kini og pagkaluya nila sa pagtuman sa ilang katungdanan.

* * *

May awhag diay ko ni Arnel nga himoi ra og aksyon ang reklamo sa taga Kamagong, Lahug kabahin sa mga sakyanan nga sagad anha ra iparking sa karsada.

Peligro kaayo kini kon may sunog nga mahitabo kay ang mga fire trucks dili na makadali-dali pagresponde kay mababagan man. Sama niadtong dunay police operation sa maong dapit nga ang mga patrol cars wala makasulod.

Awhagon nako ang kadagkoan sa One Stop Towing Services ug Road Warriors Towing Services nga himoi ninyo og kampanya kining maong dapit kay nagreklamo na ang mga lumolupyo diha sa Kamagong.

* * *

Malooy bitaw unta kita sa mga tawo nga maapektahan g'yod pananglit hugtan na ang pagpatuman sa ordinansa nga magdili sa pagpasakay og bata sa usa ka motor.

Duna man go'y ordinansa nga ang bata nga ang edad ubos sa siyete-anyos dili gayod mahimong pasakyon sa motor, bisan pa og magsul-ob pa og crash helmet. Daghan ang nabalaka ani kay ubay-ubay man g'yod ang madakpan.

Niadto lang Sabado, duna ko'y mga drayber sa motor nga gipara kay nagpasakay og bata sa motor, ang uban nila wala masayod nga dunay balaud nga nagdili niining maong punto.

Ang uban usab miingon nga gasto na kaayo kon pananglit ang ilang asawa o kaha bata pasakyon og laing sakyanan unya sila mag-motor. Ang tumong sa maong ordinansa mao ang paglikay nga ang mga bata maangin kon madisgrasya ang motor.

Mao man gani nga duna sa'y balaud nga ang mga bata dili gayod pasakyon sa atubangang bahin sa mga sakyanan, sama sa kotse, gawas kon may tinuyo gayod nga lingkuranan kanila ug may seat belt.

Buyno, malooy g'yod unta ta apan wala kita'y mahimo kon hugtan na ang pag-implementar sa balaud. Mao nay pagaingnon "Dura Lex, Sed Lex," nga sakit ang pagpatuman sa balaud, apan unsaon man nga mao man kini ang balaud.

* * *

Ang Land Transportation Office-7 ug ang iyang law enforcement arm, ang Task Force Alpha, mohimo og lakang karong adlawa aron pagpahinumdom sa mga drayber nga molikay sila paghimo og mga salaud aron dili makabayad og dagko nga multa.

Ang hugtan sa paghimo'g kampanya sa TFA mao ang mga pangpublikong sakyanan sama sa PUJ. Ang ilang mga sakyanan butangan og stickers nga magpahinumdom kanila sa dili pag-abuso sa pagmaneho aron dili madakpan.

Tabang kini sa TFA kanila nga dili makamulta. Sayonan ka nga ang "reckless driving" ug "disregarding traffic signs" karon ang multa katumbas na man sa usa ka sakong bugas-humay.

* * *

Email: [email protected].