Pakurat ni Rama

Si Bise Mayor Michael Rama nangangkon nga maayo siyang tinun-an sa kasaysayan. Maong wa siya mahasol ning labing uwahing pagsuway sa ilang relasyon ni Mayor Tomas Osmeña. Kay dunay mas grabeng mga panagsungi ang niulbo tali sa mga haligi sa politika sa karaang Sugbo nga nahusay. Nipasumbingay si Rama nga kasamtangan lang ang kahimangod ni Osmeña niya.

Nalinga tingali si Rama pagsige og lingi sa kagahapon. Nga nataligam-an niya ang kamatuoran nga iyang nahimutangan karon. Nakalimot siya sa usa sa labing mahinungdanong lagda ni Osmeña sa politika: Ang higala sa imong kaaway imo sang kaaway. Nasaag si Rama asa siya angay nga mopusta.

* * *

Human sa kapin sa dekada nilang panag-uban, lisod tuohan ang mga intriga nga giisip nang Osmeña nga kaaway si Rama. Apan may abunda siyang sukaranan nga mahimangod sa iyang pangabaga. Duhay atong hisgutan (di na lang iapil ang subsob nga mga hunghong sa mga alyado ni Osmeña nga suko kaayo kay di sila kapilde ni Rama):

• Gawas nga gidawat ni Rama ang P2 milyones nga hinabang ni Gobernador Gwen Garcia sa Sinulog Foundation, sa way paghatag ni Osmeña og higayon pagpuno sa mas dakong hinabang gikan sa Dakbayan sa Sugbo, pintok pa gyod niyang gisalikway ang sugyot ni Osmeña nga iuli ang kuwarta; ug

• Nangayo’g pasaylo si Rama ni Jonah John Rodriguez, dumadapig ni kanhi mayor Alvin Garcia nga nakonbikto sa pagbinastos ni First Lady Margot Osmeña pinaagi sa text, nga gipalayas ni Osmeña gikan sa Sinulog Grandstand.

* * *

May sukaranan bang mga pagduda nga drama lang ang away nilang Osmeña ug Rama? Nga gimik ra ni nilang duha aron pagsukod kinsay tinuod nga mga lunod-patay nga mga sakop sa BO-PK? Ug aron masihag sab unsay baraha nga gitagoan sa mga Garcia-nga gidudahang determinado gyong mosuway pagsakmit sa liderato sa dakbayan?

O tinuod ba ang pasangil ni Gobernador Garcia nga lain na sab ning ata sa paglibug-libog ni Osmeña (nga iyang gipakisama sa nukos) sa mga Sugbuanon? Aron pagtabon sa gipasangil nga pangurakot sa transaksiyon sa SRP uban sa Filinvest?

* * *

Kasaligang mga tinubdan nipasalig nga mahusay ra ning labing bag-ong panagsungi tali nilang Osmeña ug Rama. Samtang tinuoray nga nahimangod si Osmeña, di siya andam nga moatubang sa mas dakong suliran sa gikahadlokang pagbalitok ni Rama ngadto sa oposisyon.

Igo lang niyang gipahinumdoman si Rama (1) kinsay amo nilang duha, (2) asa siya angay nga mopusta ug (3) nga di makab-ot ang iyang ambisyon kon mamangka sa duha ka sapa ug motila sa tanang lapalapa. Nakapait kay si Osmeña wa mabantog sa kahinay ug pinugngan nga pagsulti. Maong napugwat ang mga Sugbuanon. Ug, labing mahinungdanon alang ni Osmeña, gilubat-lubatan si Rama.

* * *

Email:[email protected]