Political will ang gikinahanglan

Nalipay ko kay gibutangan na g’yod og mga polis ug kawani sa City Hall ang Osmeña Boulevard nga atubangan sa Basilica del Santo Niño aron mabadlong ang mga badlongong tindera og imahen.

Ako’y mireklamo ni Acting Mayor Mike Rama sa grabe na kaabusado sa ubang tindera og imahen nga bisan ang karsada nga anaa sa “main gate” sa simbahan, ila na nga gibabagan.

Himoon nila kini panahon sa alas singko sa hapon gikan sa adlaw nga Lunes hangtud Sabado. Inigka Dominggo, mas sayo pa nga ilang ukopahon ang usa g’yod ka “lane” sa karsada.

Gisugyot nako ni Rama nga kinahanglang butangan og kawani sa Squatters Prevention Encroachment Elimination Division (Speed) ang maong dapit. Niadtong Dominggo, duna g’yod tuod.

Ambot kaha sa pagka hapon kon nakontrolar ba nila. Kagahapon, nakadawat ko og text message gikan sa mga vendors nga nagpahibalo nga ugma, i-clear kuno sa SPEED ang mga tindahan dapit sa eskena.

Gihangop kini sa mga tindera kay aron mahunong na unta ang pagpahimulos sa ilang presidente nga si Haide Basan Amora nga nagbutang og tindahan diha sa eskena bisan og duna na siya pwesto didto sa concrete stalls sa D. Jakosalem.

Kining bahina maoy angay’ng tan-awon ni city administrator Francisco Bimbo Fernandez ug ni Urban poor consultant Gerry Marquez.

Unsaon god, mora man kini sila og bungol nga dili makadungog ug buta nga dili kaayo makakita bisan og nasayod na unta sila sa tinuoray’ng sitwasyon.

Si Marquez gimandoan na kaniadto ni Tommy nga si Basan kuhaan na sa iyang pwesto diha dapit sa eskena, apan ang mando sa mayor wala tumana ni Marquez kay kuno gipugngan siya ni Bimbo.

Mao na ni ron. May mas hawod pa diay sa mayor? Basin og nalimot si Gerry Marquez sa protocol nga kon mosulti na gani ang anaa sa taas nga katungdanan, kinahanglang wa nay mosulti sa mga naghupot og ubos nga ranggo.

Wala malilong ni Marquez nga kini si Basan, dunay iya nga pwesto didto sa concrete stalls. Siya man gani ang naghimo og imbintaryo niini kaniadto ug maoy mitug-an kanako.

Kini maoy rason nga wala na g’yod ko mo-interview ni Marquez kay dili ko buot nga mahimo lang kulokoy nga hatagan og pamahayag nga dili tumanon.

Alang usab ni higalang Major Vicente Mercado, ayaw na pag-agad, my friend, kon dunay mga tindera nga maghatag og kasamok sa pag-agi sa mga sakyanan diha sa Osmeña Boulevard, dakpa ug sakmita ang mga baligya.

Kon ang inyong aksyon sama lang sa usa ka sagbot nga lusay, nga kon asa hapaka sa bawod adto usab mopauraray, wala g’yod tay mahimo.

Tiaw mo, hasta ang amahan ug igsoon ni Basan mireklamo niya. Balikon nako Bay Basan, isip presidente sa usa ka grupo, maayo man gani nga unahon nimo ang paghatag og kaayohan sa imong mga sakop.

Adonahan ka kon itandi kanila mao nga dili ka na unta magbuhat niana.

* * *

Paspas na g’yod karon ang kalampusan sa PNP Criminal Investigation and Detection Group (CIDG) ubos sa pagpangulo ni Senior Superintendent Guillermo Eleazar.

Tungod niini, ako silang pahalipayan pinaagi sa paghatag sa akong pagdayeg. Angay g’yod nga daygon ang kinatibuk-ang sakop sa CIDG aron madasig pa sila sa paghimo og dugang operation.

Ang deputy director ug tigpamaba sa CIDG-7 nga si Superintendent Ritchie Posadas mitug-an nako nga daghan sila karon og project nga padayon pang giugmad.

Sige, fight g’yod.

* * *

Usa ka syudad dinhi sa Sugbo gikataho nga mipasuspenso sa pagpatuman og curfew sa kabataan aron kuno makasuroy ug makalingaw-lingaw sila lapas sa alas diyes sa gabii atul karong Pasko.

Usa ka reporter misugyot nako nga kuhaan og pamahayag si acting mayor Rama kay basin og ingon usab niini ang buhaton dinhi sa dakbayan.

Wala na lang hinoon siya modayon sa pagpangutana dihang giingnan nako nga dili na kinahanglan nga isuspenso ang pagpatuman sa curfew sa kabataan dinhi sa dakbayan kay wala man kini ipatuman.

Aw tan-awa lang god. Dunay mga batan-on nga sakop sa Bloods ug Cripps nga magkalambora, magpatay. Ang mga sakop niining maong mga grupo sagad mga batan-on.

Kon gipatuman pa ang curfew dinhi sa dakbayan, dili unta kini mahitabo. Dili ba mayor Mike?

* * *

E-mail: [email protected]