Buslot sa klase

Ang pagbisto sa mga tinun-an sa Talisay High School nga gibuwad sila sa init tungod sa kapakyas pagda og mga botelya sa usa ka food supplement nakapahinumdom natong tanan sa dagkong buslot sa mga tulonghaan sa kagamhanan nga wa pa matapaki hangtod karon:

• Padayon diay nga pinugsanay ang pagpangolekta sa mga amotan ug ubang panginahanglan sa mga klase, bisan sa hilas-hilas nga pasalig sa kadagkoan sa DepEd;

• May mga takna ug mga adlaw diay nga di maklasehan ang mga bata kay gisapot ang magtutudlo, o nagtigom ang kadagkoan sa tulonghaan sa mga takna sa klase; ug

• Kon may magtutudlo nga mopalta, papaulion lang ang mga bata, way makapuli kay way gahin alang sa substitute teachers.

* * *

Alang sa mga magtutudlo nga wa pang kahibawo nga gidili nang corporal punishment batok sa ilang mga tinun-an, niang listahan sa gidili nga mga silot sa mga tulonghaan sa India:

1. Pagpalingkod sa mga bata sa hangin;

2. Pagpalukdo sa mga bata sa ilang school bags;

3. Pagpabarug ug pagbuwad nila sa adlaw gawas sa classroom;

4. Pagpaluhod sa mga bata samtang nagklase;

5. Pagpabarug nila sa lingkoranan;

6. Pagpaisa sa ilang mga kamot sa dugayng panahon;

7. Pagpapaak sa ilang lapis o ballpen samtang nagbarug;

8. Pagpakupot sa ilang dunggan sa ilang kamot nga gipaagi ubos sa ilang paa;

9. Paggapos sa mga kamot sa mga bata;

10. Pagkusi o paglubag sa ilang dunggan; ug

11. Pagbunal nila.

* * *

Nia sang listahan sa emosyonal nga mga silot:

1. Pagpangasaba, pag-insulto ug pagpakauwaw;

2. Pagbutang og karatula sa kalapasan sa bata ug pagpalakaw niya libot sa tulonghaan;

3. Pagpabarug nila sa luyo sa classroom samtang nagklase;

4. Pagsuspenso nila sud sa pila ka adlaw;

5. Pagbutang og karatula sa ilang bukobuko nga magkanayon "Buang Ko", "Ako Usa Ka Unggoy" ug uban pa;

6. Pagsuroy sa bata sa tanang klase aron pagpakauwaw niya;

7. Pagpahukas sa mga bata sa ilang sinina; ug

8. Pagsige og basa sa listahan sa mga bata nga wa pa kabayad sa mga amotan.

* * *

Niang uban pang negatibong mga silot:

1. Pagtanggong sa mga bata atol sa recess ug paniudto;

2. Pagtanggong nila sa ngitngit nga lawak;

3. Pagtawag sa mga ginikanan o pagsugo sa mga bata pagda og suwat sa mga ginikanan nga mangayo og pasaylo;

4. Pagpapauli sa mga bata o pagpagawas nila sa tulonghaan;

5. Pagpalingkod sa mga bata sa sawog sa classroom;

6. Pagsugo sa bata paglimpiyo sa palibot;

7. Pagpada sa mga bata ngadto sa buhatan sa prinsipal;

8. Di pagpaapil nila sa mga duwa ug ubang kalihokan sa klase;

9. Pag-iban sa ilang grado; ug

10. Pagpahamtang og naghinobrang mga amotan.

* * *

Email:[email protected]