Daku g'yod kaayo ang akong pagdayeg ni Konsehal Edgardo Labella kay maminaw siya sa sentimento sa katawhan, ilabi na kon ang isyu maglambigit sa pagpatuman og mga bag-ong lagda.
Nakurat ko kay atul sa sesyon sa konseho kaniadtong Miyerkoles, gibakwi ni Konsehal Labella ang gitinguha niya nga pagmugna og ordinansa nga magdili na unta sa pag-transport sa mga liquified petroleum gas (LPG) products nga ikarga lang sa mga motor pinaagi sa paghigot og pisi.
Nahalingi-lingi god ang mga ubang konsehal tungod kay gibutyag man ni Labella nga ang iyang rason pagbakwi sa gisugyot nga ordinansahon nagumikan sa akong report nga nagkutlo sa iyang "proposed ordinance."
Gipasabot ni Konsehal Labella nga mao kini ang nakaayo kon ang usa ka isyu mahisgutan usa sa media sa dili pa tukion sa konseho kay mahimong makakuha sila og baruganan sa katawhan.
Apan subo lang kay dili ingon niini ang baruganan ni Vice Mayor Michael Rama nga maoy presiding officer sa konseho.
Sa akong gisuwat nga balita, mikuha ko og baruganan sa yano nga pumapalit og LPG nga mahimong maapektahan sa ordinansa kon madayon ang gisugyot ni Labella.
Ang maong tawo nga sagad mogamit lang sa iyang motorsiklo pagpalit og LPG cylinder kay wala may sakyanan nga mopaingon sa ilang dapit sa barangay Busay, mihatag og baruganan nga daghan ang masakripisyo kon did-an na ang pagpakarga og LPG products sa mga motor.
Gidayeg usab nako si Labella ug konsehal Arsenio Pacaña kay sila ra padayong mohatag sa media og advance copy sa ilang mga proposed resolutions ug ordinances bisan sa pagdili ni Vice Mayor Rama.
Ang ubang konsehal kurog man.
* * *
Hangtud karon nagpabilin si Citom executive director Arnel Tancinco nga wala gihapon mohatag og pagtagad sa akong gireklamo kaniya bisan sa iyang pasalig.
Pait kaayo ang mga tawo nga mokang-kang lang ang kamot pagdawat sa ilang sweldo, ilabi na nga petsa 15 na ra ba ugma.
Matag agi nako sa mga karsada nga dunay mga sakyanan nga mogawas sa grabe nga mag-atras kay sayop ang pag-park, mahinumdom dayon ko aning Arnel.
Mga alas utso na sa gabii nga miagi ko diha sa Salinas Drive, Lahug kaniadtong Dominggo ug duha g'yod ka sakyanan ang migawas sa grahe sa maong mga balay-patigayon nga wala motuman sa tukma nga parking style, apan ambot og nganong wala man ni tagda ni Arnel.
Kami sa The FREEMAN - tungod tingali kay wala man siya makagusto nga pirmi siyang kulatahon sa atake - gibutangan g'yod niya og puthaw nga railing ang among garahe.
Apan ingnon ko ikaw Arnel nga angay kang mauwaw sa pagpadayon paghupot anang imong katungdanan nga wala kay maayong serbisyo. Kon ako pa ang anaa sa imong lugar, dugay ra ko nga mi-resign ug nangita'g laing trabaho.
Sa imong edukasyon mora'g daghan man tingali nga trabaho nga mohaum nga mas makamao ka pa. Usik kaayo ang kwarta nga gikan sa buhis sa katawhan nga isweldo ra nimo nga walay klarong serbisyo.
Wala g'yod masayop ang mga higala ko diha sa Citom nga mihulagway nga gimingaw sila sa maayong serbisyo nila ni Sammy Darza ug Bobit Avila nga dihang sila pa ang nagdumala sa Citom, aksyon agad sa mga reklamo.
Tinuod g'yod, nahinumdom ko nga sila si Darza ug Avila kon dunay reklamo aksyonan dayon, dili sama niining Arnel nga maayo lang mohimo'g mga pasalig.
Pagbaton usab tawon og kaikog Arnel uy, ayaw kalimot nga ang kwarta nga gisweldo nimo gikan sa buhis sa katawhan. Kon padayon ka man g'yod nga mopilit diha sa imong katungdanan, lihoka ang mga trabaho nga walay pagpinig!
Tan-awa nang mga balay-patigayon buyon sa Camp Arcadio Maxilom sa Salinas Drive, Lahug nga gipanag-iya og retired police officer, nagtuman ba god na sa lagda?
Sigaha kuno ang imong mata Arnel, unya pagkuyog mo si OBO chief Engr. Josefa Ylanan, tan-awa usab ninyo ang parking area sa USP diha sa ilang atubangan kon wala ba makalapas sa lagda?
Ang nakadaut ninyo kay ang ubang kalapasan sa balaud nga maoy tinuod nga nakapamugna og problema sa trapiko inyo mang gipiyong-piyongan. Kon manerbisyo gani kita sa kagamhanan, ayaw pagligoy-ligoy aron ang katawhan dili usikan nga magtan-aw sa kwarta nga isweldo ninyo.
* * *
E-mail: birador_freeman@yahoo.com