Usa batok tanan

Kaluoy sa Dakbayan sa Talisay. Way bisan usa sa iyang 179,359 ka mga molupyo ang nagpakabana pagbaraw sa giingong mga binuang ni Joavan Fernandez. Wa say bisan usa nila nga nakapugos ni Talisay City Mayor Soc Fernandez pagbadlong sa iyang sinagop. Way bisan usa nila nga nakapalihok sa kapolisan ug sa sistema sa hustisya pagbutang og kinutoban sa gipasangil nga mga panghagis ni Joavan. Tungod ning pait nga kamatuoran, way bisan usa sa nangangkon nga mga biktima ang mangahas sa pagbarug. Ang pipila nga nangisog pagkiha di makahimo paglahutay. Kay way bisan usa sa 179,359 ka molupyo sa Talisay ang mangahas pagpaluyo nila.

* * *

Ang mas makauuwaw nga kamatuoran mao nga di monopoliya sa taga Talisay ang katalawan:

*Wa say bisan usa sa 292,530 ka molupyo sa Dakbayan sa Lapu-Lapu ang nakabaraw sa gipasangil nga mga kahiwian ni Mayor Arturo Radaza;

*Way bisan usa sa 318,515 ka mga molupyo sa Mandaue ang nakapugos sa lokal nilang mga opisyal paghiusa pagpalambo sa ilang dakbayan;

*Way bisan usa sa 798,809 ka mga molupyo sa Dakbayan sa Sugbo ang nangisog pagpahunong sa vigilante killings nga klarong gipasagdan lang sa mga politiko ug kapolisan;

*Way bisan usa sa 3.8 milyones ka mga molupyo sa lalawigan sa Sugbo ang nakapugos ni Gobernador Gwen Garcia paghatag og kuwentada sa CICC; ug

*Way bisan usa sa 90.46 milyones ka mga molupyo sa Pilipinas ang nakapugos ni Pres. Arroyo pagpatin-aw sa Hello Garci scandal.

* * *

Mao ni ang tunglo sa atong panahon. Ang kinabag-an way gihimo pagpakgang sa pipila nga nagpabadlong. Ang mas dakong tunglo nga di ni nato monopoliya. Mao sab ni nahitabo sa atong mga ginikanan.

Nangiyugpos lang sila dihang gipakanaog ang martial law ni Ferdinand Marcos ug sa pipila lang niya ka mga hinanib. Sama nga ang atong mga katiguwangan nga nag-una nila nagpaulipon sa gatosan ka katuigan sa pipila lang ka mga langyaw.

* * *

Nganong lisod mang kumbinsihon ang katawhan nga kon magkahiusa sila wa silay di mahimo:

Silang Soc ug Joavan way mahimo kon magkahiusa ang 179,359 ka mga molupyo; pagpatuman sa balaod sa Talisay;

Si Radaza di kasukol kon ang 292,530 ka mga molupyo sa Opon nay magtinabangay pagsuhid sa iyang binuhatan;

Magtinabangay ang mga politiko sa Mandaue kon mamugos nang 318,515 ka mga molupyo;

Mokagiw ang mga vigilantes ug ilang mga padrino kon ang 798,809 ka mga molupyo sa Dakbayan sa Sugbo nay mobaraw nila;

Mapugwat si Gwen pagsubay giunsa paggasto ang kuwarta nga di iya kon ang 3.8 milyones ka mga Sugbuanon nay maningil; ug

Sama kaseguro nga mosidlak ang adlaw sa silangan, magkabunga-bunga si Arroyo pagpasabot sa milagro sa piniliay sa 2004 kon ang 90.46 milyones na ka mga Pilipinhon ang mopadahunog sa nagkahiusa nilang tingog.

* * *

Email:[email protected]