Kini bitaw'ng pag-drive og motorsiklo, sama ra kini sa pagmaneho og ubang matang sa sakyanan.
Sa ato pa kon mag-ikis-ikis ang pinadaganan sa magmaneho og motorsiklo, mahimo kining madakop tungod sa "reckless driving."
Ang tinuod, duna usab ko'y motor apan tungod kay nagbasa man ko sa mga lagda sa "proper driving" mao nga dili ko sama sa ubang motorcycle drivers nga pwerte pagka-abusado. Naingon man god niini ang sagad mga drayber sa motorsiklo kay naghalhal ra man ning mga traffic enforcers nga igo lang motan-aw sa mga binuang sa mga magmaneho'g motor.
Kon gisugdan pa nila ang pagpanakop niining maong mga drayber tingali hinay-hinay na nga napitol ang ilang dili maayong binuhatan.
Dili angay'ng kaloy-on kining maong mga matang sa tawo kay sila maoy mga tawo nga dili angay'ng tugotan sa pagmaneho og sakyanan.
Samtang magmaneho ko'g sakyanan, makita g'yod nako ang mga abusadong drayber - sagad mga nagmaneho og public utility vehicles sama sa taxi ug PUJ - nga mokalit lang pagsulod sa imong agianan nga gisubay.
Unsaon nga kining atong Land Transportation Office (LTO) naputos man god sa pangurakut. Kon giayo pa nila sa pagtudlo ang mga drayber nga kadto rang makapasar sa pasulit ang hatagan og lisensya, makat-on g'yod unta ang mga drayber.
Apan unsaon, pangwarta lang ang anaa sa ilang hunahuna. Ambot og duna bay mga aplikante nga mokuha'g lisensya sa pagmaneho og sakyanan nga nahagbong sa pagkuha'g examination. Mora'g wala g'yod.
Samtang nagpataka na lang sa paghatag og lisensya ang LTO sa mga moaplay og lisensya, ang maong mga drayber kon anaa na sa kadalanan wala usab pangdakpa sa mga traffic enforcers.
Mao unta kini ang angay'ng hatagan og pagtagad ni Arnel Tancinco apan kining maong opisyal sa CITOM pakyas sa pagtuman sa iyang katungdanan.
Alang ninyo nga mga drayber, ibutang sa inyong hunahuna nga dili kay kamo ra ang tag-iya sa karsada nga magbuot ra kamo kon asa ug kanus-a moliko.
Kaninyo usab nga mga traffic enforcers, ipatuman ang balaud sa walay pagpinig. Ayaw ninyo og sunda si Arnel Tancinco nga pinili ra ang himoan og lakang.
Kini si Tancinco bisan og giunsa nimo pagsaway, wala gayod mausab. Ang mga gipasalig niya nga himoon aron kuno pagmatuod nga dili siya bayas pulos wala gihapo'y aksyon.
* * *
Wala na g'yoy laing rason pa ang dakbayan nga dili mobayad sa mga sumosunod ni Matilde Palicte sa kantidad sa yuta nga gigamit sa dakbayan ug gipapuy-an sa mga urban poor families diha sa barangay Capitol Site.
Gideklarar na sa Korte Supreme nga si Matilde Palicte mao g'yod ang tinuoray'ng tag-iya sa Lot 1049 nga gi-expropriate sa dakbayan kaniadtong 2002.
Matud sa Korte Suprema nga dili tinuod nga ang maong yuta gipanag-iya sa Estate ni Felimon Sotto.
* * *
Alang ni city administrator Francisco Fernandez angay nimong ipasabot sa publiko Sir kon ngano nga gihatagan man nimo og pabor ang presidente sa Sto. Niño Sidewalk Vendors Association nga makaangkon og daghang tindahan unya ang uban wala?
Ingon ba god niana ang tukma nga pangagamhanan Sir? Sayod ko nga ang gibarugan nimo nga prinsipyo - ilabi na sa panahon sa imong kabatan-on kaniadto dihang nangabut mo sa bukid sa Negros - mao g'yod ang pagka-makiangayon.
Wala malilong nimo nga kini si Haide "Basan" Amora nagbaton og subra sa usa ka stall diha sa concrete stalls luyo sa Basilica del Santo Niño, unya may tindahan pa g'yod siya sa dapit sa eskena.
Nganong bisan og may kamandoan na ni Mayor Tomas Osmeña nga did-an na si Basan niining maong pagpalabi-labi sa iyang mga sakop, imo man siyang gilabanan? Bisan og si urban poor consultant Gerry Marquez personal gani g'yod nga gimandoan sa mayor nga ipatuman ang iyang order, wala kini niya sunda kay nahadlok siya nimo.
* * *
Email: birador_freeman@yahoo.com