DYAB Webcast

Patay nang Skypecast. Mangayo ko’g pasaylo sa mga nisuway sa teknolohiya human nako hisguti dinhi nga gihunong na sa Skype ang Skypecast niadtong Septiyembre 1. Wa ray usa ka buwan human namo gisugdan paggamit niadtong Agosto 6. Human sa Skypecast, nahasiril-siril mig pangita og laing paagi pagpadayon pagsibya sa DYAB Abante Bisaya sa internet.

Among resident IT expert nga si JT Benz daling nakahimo og channel sa Icecast ug Shoutcast. Nga mahimong mapaminaw pinaagi sa Windows Media Player, Winamp, o VLC Player. Apan labihang langaya sa audio. Nagkomedyahay gani mi nga mo-extro na lang mi sa live broadcast, mao pay pagsugod sa among sibya sa internet. Ang pagsige og buffer sa player hasol sab kaayo alang sa mga tigpaminaw.

* * *

Maayo na lang kay gitudloan ming Jun Tariman, ang tagduma sa Hi-Tech Ta, Bay sa DYAB Abante Bisaya sa Yahoo! Live. Maong nagsugod dayon ang among live webcast (http://live.yahoo.com/dyab1512) sa niaging semana. Mas maayo kay sa Skypecast kay duna na may video. Apan bati kaayo ang kalidad sa audio.

Sama sa video nga mokaging matag karon ug unya, ang audio sa Yahoo! Live putul-putol sab. Maong nisuway ko sa conference call sa Skype nga kasalmotan og hangtod 500. Apan kay di na man mi kapawong sa mga mikropono sa mga tigpaminaw, nagyagaw ang sibya. Dihang nakat-on nang mga tigpaminaw pag-mute sa ilang mikropono, nikagar sang kalidad. Labihan ra gyong layoa sa Skypecast.

* * *

Salamat sa kamapailubon sa mga tigpaminaw sa DYAB, natagbaw na lang sab sila nga nagtan-aw sa amang nga video sa announcer's booth. Nalingaw na lang sab silang nisalmot sa public chat. Magbinayloay sa ilang mga hunahuna sa mga balita ug mga kontrobersiya nga among gisibya.

Apan duna gyoy haw-ang. Nahibawo kong inighupas sa kahinangop sa bag-ong teknolohiya, magsugod na og demanda ang mga tigpaminaw ug mas maayong paagi sa ilang pagtan-aw ug pagpaminaw sa among sibya.

* * *

Maayo na lang nga Mandauehanon nga nakapaminaw tungod sa Skypecast, nga taguon lang nato sa ngan nga Marie Corbin sa South Florida, nitultol namo sa Stickam. Nga mao diay gikopya sa Yahoo! Live.

Salamat sa laing tigpaminaw sa Skypecast, taguon nato sa ngan nga Ariel Atamosa, nasuwayan dayon namong Stickam. Gawas nga mas maayo ang video ug audio, maka-upload mig way kinutobang video ug audio files ug mga hulagway, ug maka-record pa gyod sa video ug audio sa among mga sibya. Sa ato pa, kon pul-an na sa buhi nga sibya, ang publiko makapaminaw ug makatan-aw sa among podcasts ug mga hulagway sa nagkalainlaing mga proyekto sa DYAB Abante Bisaya.

Sa Lunes pa mi magsugod sa buhing sibya sa Stickam. Sa di pa diay ko malimot, makaduaw na mo sa labing bag-o namong webcast: http://www.stickam.com/dyab1512. 

* * *

Email:[email protected]