Kurog sa Sulpicio?

Ang pagkabulilyaso sa laing barko sa Sulpicio Lines, bisan wa pa mahuman ang imbestigasyon sa pagkalunod sa MV Princess of the Stars, makapahinumdom sa tanang hingtungdan sa kadakong balikas sa pagtugot sa kagamhanan nga makalutaw pagbalik ang mga barko. Bisan sa napakitang mga ebidensiya sa responsibilidad sa Sulpicio sa labing grabeng katalagman sa kadagatan karong tuiga nga nikalas og labing 700 ka kinabuhi.

 Ang pagtugot sa Marina Board nga makapamasahero na pagbalik ang mga barko sa Sulpicio pila ka adlaw sa wa pa luwati sa Board of Marine Inquiry (BMI) ang rekomendasyon pagsuspenso sa prangkisa sa kompaniya, ug bisan sa kusganong pagsupak sa mga tagtungod sa nangamatayng mga pasahero, nagmatuod gyod diay hain kapusta ning gobyernoha.

* * *

Ang kamandoan sa Marina paggakot sa MV Cotabato Princess human nasangad ug nabangga sa pantalan sa Iloilo nakapahimutang sa pagduda sa kaligdong sa mga inspeksiyon nga gihimo sa ahensiya. Nganong nahatagan man og pagtugot ang barko ug mga tripulante nga di man gani diay kamaong modunggo sa pantalan? Tinuod ba gyod diay ang pasangil ni kanhi administrador Vic Suazo sa Marina nga way barko sa Sugbo nga seaworthy apan pulos nakalusot kay may mga opisyal sa Marina nga naa sa payroll sa mga kompaniya sa barko?

Ang lusot ni Kapitan Virgilio Ilagan sa Cotabato Princess nga nasangad ug nabangga sila tungod sa kadagko sa bawod angayng himuong sukaranan paglaksi sa iyang lisensiya. Wa siyay kalainan sa PUJ driver nga namasangil nga nabangga siya kay daghang sakyanan sa dan.

* * *

May sukaranan ang hagit sa mga biktima sa Princess of the Stars nga silotan ang Sulpicio ning labing bag-o nilang bulilyaso. Ingon ini ba gyod ka-feeling hawod ning kompaniyaha nga wa pa gani maugkat ang tanang patayng lawas sa ilang mga pasahero ug mga tripulante gipadagan na sang ilang mga barko nga morag silay tag-iya sa dagat?

Atong tan-awon mangahas ba paghikap sa Sulpicio ang bag-ong tagduma sa Marina nga si Ma. Elena Bautista. Kon modupa inay mosagpa sa kompaniya, klaro na nganong siyay gipuli sa kalit lang ni-resign nga si Suazo.

* * *

Laing bulilyaso sa Marina. Ug sa Phil. Coast Guard (PCG). Ug sa pamunoang Arroyo.

Ang MV Edago Expedition nalunod sa kadagatan sa Kasadpang Kabisay-an upat ka buwan nang nilabay. Atol sa pagkusukuso sa bagyong Cosme. Wa pa si Frank. Wa pa malunod ang Princess of the Stars.

Hangtod karon, way search operations nga nalusad alang sa Sugbuanong mga tripulante. Hangtod karon wa magtagad ang kompaniya sa barko pag-atiman sa mga tagtungod sa mga tripulante. Hangtod karon way imbestigasyon ang Marina ug PCG nganong nalunod ang barko, nganong wa dayon matabang ang mga sakay ug nganong gipasagdan lang ang mga biyuda ug mga anak sa wa na igkitang mga tripulante.

* * *

Email:[email protected]