Kapintas sa krimen
Way sakop sa media nga wa mahasol sa pagdagit sa mga bandidong Abu Sayyaf ni Ces Drilon ug sa iyang cameramen nga silang Jimmy Encarnacion ug Angelo Valderama, pulos taga ABS-CBN, sa Sulu. Nganong ang mga sakop sa media nga igo lang nangita og balita hilabtan man? Nganong may mga bahin pa man sa nasud, sama sa Maimbung sa Sulu, nga di luwas alang nila?
Apan ang nahitabo nilang Ces, Jimmy ug Angelo di makapahadlok, hinunoa makapadasig hinuon sa mga sakop sa media sa pagpadayon sa matinud-anong pagtuman sa ilang gimbuhaton. Ang nagbuntaog nga kakulian di angayng makapugong pagtuman sa tahas pagbugtaw sa kamatuoran.
* * *
Ang pagdagit nilang Ces ug kaubanan di maoy una. Ug gikahadlokang di maoy kataposan. Ikaduha na ning pagdagit sa mga tigbalita sa ABS-CBN sa niaging walo ka tuig. Niadtong 2000, silang Maan Macapagal ug iyang cameraman nga si Val Cuenca gidagit sab tungod sa pagsunod sa sugilanon mahitungod sa Abu Sayyaf. Laing gidagit sa mga bandido mao ang freelance journalist nga si Arlyn dela Cruz niadtong Abril 2002.
Si Gene Boyd Lumawag, photojournalist, gipusil ug gipatay sa Abu Sayyaf samtang nagkuha og hulagway sa kilumkilom sa Sulu niadtong Nobyembre 12, 2004. Gidagit sab sa mga bandido ang langyawng mga peryodista nga nagsunod sa pagdagit sa 21 ka langyaw nga mga turista gikan sa Sippadan beach resort sa
* * *
Ang nahitabo sa mga sakop sa media sa mga kamot sa mga bandido di talagsaon. Mao sab ni nahitabo sa kasarangang mga molupyo di lang sa Sulu kon dili sa uban pang bahin sa nasud nga nisulbong pag-ayo ang kriminalidad. Wa lang sila manganli ug ang nahitabo nila wa lang mahibaw-i kay di man sila inila ug ang ilang mga panginabuhi wa man isipa nga mahinungdanon.
Silang Ces, Jimmy ug Angelo mao lay kinauwahian nga napuno sa nagkataas nga listahan sa mga biktima sa pagpanghasi ug pangabuso. Nga nahimo sa tumang kasayon tungod sa kapakyas sa kagamhanan pagpatuman sa balaod ug pagpanalipod sa mga magbubuhis.
* * *
Sa sunod higayon nga manghambog na sab si Pres. Arroyo nga malinawon ug malambuon ang nasud, ato siyang pahinumdoman sa nahitabo sa mga sakop sa media ug sa mga way ngan ni nawong nga mga biktima. Ang gamot nga mga hinungdan sa krimen, o rebelyon, mao ang managkaluhang tunglo sa katimawa ug inhustisya. Nga nilipang pag-ayo ubos sa iyang pamunoan.
Mapatunhay lang ang kalinaw ug kalamboan sa nasud kon mahaw-as ang kinabag-an sa katawhan gikan sa makamatay nga kakabos. Ug kon mapatuman nang balaod bisan kinsay hingtungdan ug bisan kinsay maig-an. Apan unsaon man ni niya paghimo? Kon siya mismo gipasanginlan sa pagyatak sa balaod ug pagpanamastamas sa demokratikanhong mga institusyon?
* * *
Email: [email protected]
- Latest
- Trending
