Way mapasagdan

Ang Kapisanan ng mga Brodkaster ng Pilipinas (KBP) Cebu Chapter wa mokuwestiyon sa katungod ni Bise Gobernador Gregorio Sanchez sa pagpasaka og kasong libelo batok ni Carlo Dugaduga, area manager sa Aksyon Radyo sa Manila Broadcasting Company (MBC). Bisan naluoy mi sa pagkabalhog sa lang-og nga bilanggoan sa Talisay ni Dugaduga, nga mao say executive vice chairman sa KBP, moangkon mi nga makapili si Sanchez sa paagi pagpanalipod sa iyang kaugalingon gikan sa mga komentaryo ni kanhi mayor Gilbert Wagas sa Compostela nga blocktimer sa sibyaanan ni Dugaduga.

Apan gawas nga di ang pagkiha ray iyang kapilian, di pa gyod ni maoy labing maayo niyang kapilian. Makahimo siya pagtubag sa mga pasangil. Nga makatabang sa tanang hingtungdan. Kay mapatin-aw sa labing daling panahon ang duha ka bahin sa kontrobersiya ug makatimbang-timbang nang katawhan kinsay tuohan.

* * *

Mahimo sab si Sanchez nga moreklamo atubangan sa KBP. Nga di niya kapasanginlang nagyaka sa mga reklamo batok sa mga magsisibya nga gipasanginlang nagpabadlong. Gani, may higayon nga ang KBP nangimbestigar bisan way reklamo ug nasilotan gyong magsisibya nga napamatud-ang nakalapas sa Broadcast Code. Kun wa siyay bilib sa KBP makadangop siya sa Cebu Citizens Press Council (CCPC) nga naglakip sa labing tinahud nga mga hut-ong sa Sugbo.

Ning iyang pagkiha nilang Wagas ug Dugaduga, di na matuki ang kontrobersiya—ang pagkuwestiyon ni Wagas sa mga pangangkon nga makaayo bisan sa labing grabeng mga sakit ang produkto ni Sanchez. Nga narehistro sa BFAD isip food supplement ug busa ubos sa mga lagda di makahimo og bisan unsang therapeutic claims.

Ang naandang kalangay sa husay sa kaso di makatabang sa paningkamot ni Sanchez paglimpiyo sa iyang ngan. Apan tino nga, ug mao ni gidudahang tinuod niyang tuyo, makapahilom sa mga magsisibya.

* * *

Nakatug si Dugaduga og usa ka gabii sa bilanggoan di lang tungod sa kaapiki intawon sa panalapi kun dili tungod sab sa iyang kaikog pagsangpit sa tabang sa iyang kaubanan sa KBP. Gawas nga wa mi igong kasinatian paghikay og piyansa, naapikhan sab mi sa panahon.

Nauyonan atol sa tigom sa KBP Board ang pagtukod og Quick Reaction Team (QRT) nga motubag dayon kun dunay magsisibya nga mabilanggo, maaksidente o, simbako layo ra to, mapatay. Ang QRT pangulohan ni Atty. Ruphil Banuc, KBP Vice Chairman sa AM Radio, uban sa mga reporters sa radyo ug telebisyon. Ang ilang tahas mao ang pagtino sa mga detalye sa kaso o panghitabo. Aron nga sa labing daling panahon mapahibawo ang publiko ug maatiman dayon ang nabiktimang magsisibya, ma-sakop man sa KBP o dili.

Ipasalig namo sa mga magsisibya nga ang KBP ilang kadangpan, ug nga di sila mag-inusara ni mapasagdan, sa panahon sa ilang panginahanglan.

* * *

Email:[email protected]