Suspenso na gyod

Karong ang Visayas Ombudsman nipaubos na gyod sa unom ka buwan nga preventive suspension nilang Mandaue City Mayor Teddy Ouano ug Lapu-Lapu City Mayor Arturo Radaza, DPWH 7 Director Robert Lala ug ubang mga gilambigit sa Asean Summit Scandal, napamatud-an ni Acting Deputy Ombudsman Virginia Palanca-Santiago nga ang kaligdong ug katakos mas gamhanan kay dagkong kalyo sa mga sinumbong nga nabangga sa ilang imbestigasyon sa gidudahang multi-milyones pesos nga anomaliya sa decorative lamps nga gigamit sa niaging 12th Asean Summit. Napamatud-an sab nga makairog gyod diay'ng mga kaso, sa di abuton og kalaay ug sa di pa habolan sa kalimot ang katawhan, kon tinud-on lang sa mga imbestigador.

Ang nahibilin na lang nga pamatud-an sa Ombudsman kon may igo ba silang kaisog ug determinasyon sa pagsusi sa posibleng kalambigitan nilang kanhi DPWH secretary Hermogenes Ebdane ug ubang mga opisyal sa nasudnong kagamhanan nga mas dako pang Lala ug ni Pres. Arroyo ug sa ubang mga politiko nga mas dako pa nilang Ouano, Radaza ug sa ubang lokal nga mga tigpasiugda sa summit.

* * *

Ang pagsuspenso nilang Ouano, Radaza, Lala ug ubang mga gipasanginlan usa ka butang; ang pagmatuod sa mga pasangil batok nila aron mabalhog sa bilanggoan ang tanang mga sinumbong laing butang. Mahimong kapasanginlan ang Ombudsman nga nada lang sa kainit sa pagpakabana ug kamasuk-anon sa pagpanulisok sa Sugbuanong mga magbubuhis maong nisutoy ang pagpasaka sa kaso ug pagkasuspenso sa mga hingtungdan. Ang mas lisod nga gimbuhaton mao ang pagkumbinser sa Sandiganbayan nga nakahimo sa bangis nga krimen nga plunder silang Ouano, Radaza, Lala ug kaubanan ug busa di angay'ng makapiyansa alang sa temporaryong kagawasan ug kinahanglang pahamtangan sa silot sa kamatayon.

Di maayo ang rekord sa Ombudsman, labi na ubos sa pamunoan ni Merceditas Gutierrez, tinudlo sa presidente ug tawo ni First Gentleman Mike Arroyo, nga nimando nga kinahanglang moagi sa iyang pagsubli ang tanang kaso nga imbestigahon sa ilang buhatan sa Visayas, Mindanao ug Luzon. Ning higayona, si Santiago ug ang iyang graft investigators igo na lang sa pagrekomendar.

* * *

Managlahi ang reaksiyon sa ilang pagkasuspenso nga gipadayag sa mga kampo nilang Ouano ug Radaza ngadto sa publiko. Si Radaza masaligon nga mas moinit ang pagpaluyo sa iyang mga dumadapig tungod sa iyang giisip nga pagpanggukod. Samtang pipila sa mga dumadapig ni Ouano nipasidaan nga mag-people power sila sa City Hall.

Ang mga abogado nilang Ouano ug Radaza mahimong modangop sa Court of Appeals (CA) nga mao na lay makapugong sa suspension order sa Ombudsman. Apan ang suspenso, atong balikon, di silot. Gitumong lang aron nga di maguba ang mga dokumento ug di mahulga ang mga saksi. Kon ilang supakon, kapasanginlan silang Ouano ug Radaza nga may gitagoan ug nagtinguha diay pagsabotahe sa imbestigasyon.

* * *

Email:[email protected]