Priso silang tanan

May sukaranan ang kabalaka nga mainutil ang Department of Public Works and Highways (DPWH 7) kon ipaubos sa preventive suspension ang tanang mga opisyal nga nahilambigit sa gidudahang gipanguwartahan nga mga transaksiyon sa niaging 12th Asean Summit. Matod ni Crisologo Saavedra, nga labing dako og natabang sa graft investigators sa mahinungdanong mga dokumento sa nangalisbong mga transaksiyon, ang 19 ka opisyal nga gikiha sa Ombudsman mao rang nakapirma sa pagpaggawas sa kuwarta ngadto sa mga kontraktor. Nitinosiya nga makiha sab sa mosunod nga mga adlaw ang mga nahilambigit sa ubang bahin sa transaksiyon. Nga mahimong makahurot gyod sa taga DPWH 7.

Gitataw hinuong Saavedra nga di angayng mohunong ang Ombudsman kutob lang ni DPWH 7 Director Robert Lala. Matod niya angayng iapil sa kaso, kay klarong silay nagtugot, nanimon, nanglaktod ug gidudahang apil sa nabuhong pag-ayo sa mga transaksiyon, silang kanhi DPWH (karon Defense) Secretary Hermogenes Ebdane ug DPWH Asst. Secretary Juanito Abergas, nga nadestino niadto sa Sugbo isip DPWH 7 director ug karon mao nay nagduma sa tanang mga proyekto sa Kabisay-an.

* * *

Dunay mga maapil sa kaso nga wa kabahin sa gituohang mga namurot ug nabusdik nga mga nag-piyesta sa mga transaksiyon. Apan igo lang namirma kay nahingpit nang tanang mga panginahanglan ug mga dokumento. Mahimong ang uban gani napugos lang sa ilang labawng mga opisyal.

Apan nakabahin man o wa ang mga nakapirma sa gikuwestiyong mga transaksiyon, angay silang manubag sa hukmanan sa tinuoray nilang papel sa pagpalusot sa minilyon ka pesos sa buhis sa katawhan. Ang daotang balita alang nila mao nga dunay duha ka matang sa sala:

• Ang pagbuhat sa di angayng buhaton; ug

• Ang wa pagbuhat sa angayng buhaton.

Kon tinuod man nga wa silang kabahin, ang balaod mopalingkawas nila gikan sa kasong Plunder (nga nagtangag og silot nga kamatayon) bugti sa ilang testimoniya nga kinahanglang makapalig-on sa kaso.

* * *

Inilang mga abogado sa Sugbo nitambag nilang Mandaue City Mayor Teddy Ouano, Lapulapu City Mayor Arturo Radaza ug ubang mga sinumbong nga mohunong nag kisi-kisi nga mora silang nadat-ogan sa kalibotan sa nag-ung-ong nilang preventive suspension. Aron makasugod na sa pagpangandam pagpanalipod sa ilang kaugalingon gikan sa mas seryusong hulga, nga kon di masagang magkahulogan gyod og tinuod nga katalagman.

Kon mapasakaan na og kasong Plunder silang Ouano, Radaza ug kaubanan, kay kapin man sa P50 milyones ang gikahadlokang nausik sa ilang mga transaksiyon, magdug sila sa bilanggoan ug maggakos-gakos sa tayaong mga rehas samtang magpadayon ang husay. Kay ang Plunder usa ka capital offense ug busa di makapiyansa ang mga sinumbong alang sa ilang temporaryong kagawasan. Makagawas lang sila kon makumbinser ang hukmanan nga huyang ang mga ebidensiya sa prosekusyon batok nila.

* * *

Email: [email protected]