Ang pag-endorso ni Mayor Tomas Osmeña ni konsehal Jonas Cortes nga kandidato pagka mayor sa Mandaue ug si Luigi Quisumbing isip kongresista sa ika-unom nga distrito sa Sugbo, hayan dili magbunga og kaayohan.
Abi ninyo og ngano? Wala malilong kanato nga ang mga drayber sa mga passenger jeepneys sa Mandaue - ilabi na kadtong nagdala sa rota nga 21B ug 22B, nangasuko g'yod ni Tommy.
Ang ilang kaso nagumikan sa pagdili sa kagamhanan sa dakbayan nga ang mga PUJs nga nagdala sa rota nga 22B ug 21B dili makapamasahero dinhi sa syudad ug daghan na ang mga sakyanan nga gitanggong sa City Traffic Operations Management.
Dili imposible nga ang maong mga drayber nga posibleng nakahuna-huna unta pagsuporta nila ni Jonas ug Luigi, apan pagkasayod nga gisuportahan sila ni Tommy mosibog na lang og adto na mosuporta ni Jonkie Ouano.
Kon ako ang pagbut-on, supak ko nga si Tommy moapil-apil sa pagpangampanya sa mga kandidato nga lokal kon kini atua na mahimutang gawas sa dakbayan, ilabi na og may panagsumpaki sila sa maayong kabubut-on ang opisyal sa maong dapit nga kontra sa maong kandidato.
Wala man malilong kanato nga nagkabingkil sila si Mayor Thadeo Ouano ug Tommy mao nga dili lisud toohan nga ang iyang pagsuporta nila ni Jonas ug Luigi, tungod kini sa ilang walay maayong pagsinabtanay.
Husto ba ko mayor?
Ganahan ko nga atol sa eleksyon karong mayo 14 duna g'yoy lig-on nga kandidato nga moatbang ni mayor Tommy. Apan tambagan lang nako si Lahug barangay captain Maryann delos Santos nga makadaut sa iyang dungog kon magpadala ka sa sulsol sa ubang mga tawo. Dili malalis nga pagka kapitan sa barangay, kon duna may makatupong ni Maryann sa kamaayo nga modumala og barangay, apan dili siya malabwan sa iyang pagserbisyo. Apan tabla ra og si Maryann mao si David ug si Tommy maoy Goliath. Inamigo nga tambag, maayong magkonsehal ka usa Capt sa dili ka pa mangambisyon pagka mayor. Palabya na lang ang mga sakit nga pamahayag ni mayor Tommy. Total, nangayo na man siya og pasaylo.
Gikontak ko ni kanhi konsehal Aven Piramide nga maoy nagmugna sa ordinansa nga mosilot sa mga tawo nga magpataka lang og pangihi sa mga publikong dapit dinhi sa dakbayan. Mitubag si Aven sa pamahayag ni bise mayor Michael Rama nga misaway tungod kay dunay mga ordinansa nga gimugna apan kuwang sa mga panginahanglan. Husto ang pamahayag ni Rama nga ang ordinansa dili maayo tungod kay naglatid kini nga dakpon ang masakpang mangihi diha daplin sa karsada ug ubang publikong lugar, apan walay gibutang nga public toilets. Gitataw ni Piramide nga ang city ordinance 1361 dunay kaubang ordinansa nga maglatid nga ang dakbayan magtukod og mga public toilets diha sa mga publikong lugar. Apan tungod lagi sa politika, wala kini maaprobahi. Giusab kini pagsumiter ni Konsehal Carmen Piramide, asawa ni Aven, atol sa iyang termino, apan wala gihapon maaprobahi. Nakapangutana si Aven, kinsa man karon ang sad-an? Ha! Ha! Ha!
Daw sa mga "maya nga bungol" ang mga kawani sa Squatters Prevention Encroachment Elimination Division, ang demolition team sa City Hall, kay nagpabuta-bungol man lang sila sa mga nakasamok sa karsada.
Baya sab tawon ning amigo nako nga si retired Mayor Vicente Mercado uy, dili man mauwaw nga isip hepe sa SPEED magkayamukat ra ang karsada, ilabi na atubangan ug kilid sa Basilica del Santo Niño.
Pastilan, lihok sab intawon mo uy! Kon ako ang anaa sa inyong pwesto, mauwaw kong mokobra sa akong sweldo kay wala ninyo matuman ang tahas kaninyo.
Awhagon nako si acting city attorney Rodolfo Golez nga paspasan nimo ang pagpahuman sa imbistigasyon sa mga kaso nga nasang-at sa imong opisina kabahin sa mga graft and corruption cases nga giingong nahimo sa mga kawani sa City Hall.
Kay talawan man kaayo kini si Golez nga mohatag og inpormasyon ngadto sa media kabahin sa mga kaso nga ilang giimbistigar, makaingon na lang kaming mga reporters sa City Hall nga wala tingali nila tutuki pag-ayo ang maong mga kaso.
Kini si Golez, lahi ra kaayo sa mga nangaging city attorney nga walay lipod-lipod sa paghatag og inpormasyon sa mga reporters nga magpakisayod kanila.
Dili ra ba sa tanang higayon ang mga reporters ra ang magkinahanglan og dukomento kanimo Sir. Dunay higayon nga ikaw magkinahanglan usab og dukomento nga nakuha sa usa ka reporter kabahin sa kaso nga imong buot utingkayon? Dili ba?