Kutob ra sa sugod

Ang mga Sugbuanon giduwaduwaan lang sa mga nahilambigit sa nangalisbong mga transaksiyon nga gigastohan sa makalilisang nga kuwarta nga gipabaha atol sa niaging 12th Asean Summit. Sila ray magbuot unsa ang mga dokumento nga ipagawas ug kanus-a ni ipagawas-ug sila say magpili kinsa ray pakit-on. Nakapait kay ang mga imbestigador, bisan atubangan sa sibaw nga kasuko sa mga magbubuhis sa nabistong pagwaldas sa ilang hinagoan, nisugot lang nga magpadayon ang makauuwaw nga salida:

• Ang Department of Public Works and Highways (DPWH) gitugotan sa Visayas Ombudsman nga mag-teleserye-una, giingnan ta nila nga tag P95 mil ang matag lamppost; dayon niingon sila nga, aw, tag P85 mil ra diay apan ang gipabarug sa Mandaue tag P224,000 matag usa; ug morang gipakapin na lang ang pahibawo nga duna sab diay mga suga nga tag P350 mil matag usa; ug

• Ang Dakbayan sa Mandaue nangiyugpos lang atubangan sa pila na ka buwan nga kaguliyang ug, dihang nipiyait nang DPWH nga si Mayor Teddy Ouano diay ang nagtakda sa dagkong presyo, ayha pa nipakita sa ilang dokumento-apan ang ikog ra nga nagpakita sa mga pirma, giputol ang bahin nga motug-an unta unsay ilang gipirmahan.

* * *

Si DPWH 7 Asst. Director Marlina Alviso nitumbok ni Mayor Ouano nga maoy nagpahimo ug nag-aprobar sa program of works and estimate (POWE) nga nagtakda sa presyo sa deco lamps sa Mandaue nga tag P224 mil matag usa. Apan si Ouano nisumbalik nga P50 mil ray ilang girekomendar ug ang DPWH nay nipaburot sa presyo. Apan silang Ouano ug Alvizo managsamang nagdumili sa paghatag og kopya sa ilang mga dokumento ngadto sa mga sakop sa media.

Ang tinulisokay nilang Ouano ug Alvizo mahimong mosangpot sa kasong plunder nga nagtangag og silot nga kamatayon. Dako ang kahigayonan nga ang mga opisyal sa DPWH ug Mandaue maoy mag-una sa listahan sa mga sinumbong. Maong may sukaranan ang kabalaka sa mga magbubuhis nga mahimong makaamgo silang Ouano ug Alvizo nga mas kapanalipdan ang ilang mga interes kon magsabot-inay mag-away-sila.

Makapasalig bang Visayas Ombudsman ug ubang mga ahensiya sa kagamhanan-kansang kapakyas pagtuki sa nahaunang sibaw nga mga pasangil ug kalangay sa pagsusi sa kahiwian nisangpot na sa dinalidali nga pagpagawas sa minilyon ka pesos nga kuwarta sa katawhan nga bayad ngadto sa mga kontraktor-nga kapugngan silang Ouano ug Alvizo pagmaniobra pag-usab sa ilang mga dokumento?

* * *

Ang Ombudsman di nang kapugong sa katawhan pagpanginlabot sa imbestigasyon sa higanteng mga anomaliya. Labi na nga ang katawhan, di ang mga imbestigador sa Ombudsman, maoy unang nagbutyag sa eskandalo.

Ang pagdasig sa Ombudsman pagtago sa mga dokumento makapasamot lang sa kabalaka nga kining kasoha mahisama lang sa unang mga kaso nga ilang giimbestigar-maayo lang sa sugod apan way bisan usang makiha ni mabalhog sa bilanggoan.

* * *

Email: [email protected]