Di kasinahan ang kahimtang ron ni Mandaue City Mayor Teddy Ouano. Gawas nga nagkapuliki siya pagpanubag sa mga pasangil sa pagpangawkaw sa decorative lamps sa niaging Asean Summit ug sa nahaunang deco lamps nga iyang gipangompra niadtong 2003, nag-atubang og dakong pagsuway ang iyang liderato sa pag-atiman sa labing dinaliang mga panginahanglan sa mga biktima sa kapin sa 7,000 ka mga biktima sa dakong sunog nga niugdaw sa gatosan ka kabalayan sa mga barangay sa Mantuyong ug Guizo.
Ang hanap niyang mga tubag ug pagdumili pagpakita sa iyang mga dokumento mahitungod sa deco lamps sa summit, human siya pasanginli sa Department of Public Works and Highways (DPWH) nga maoy nagtakda sa P224,000 nga presyo sa matag usa sa 124 ka suga nga gitaod sa Mandaue, wa katabang sa iyang kawsa. Ug ang iyang kapakyas paghatag sa Commission on Audit (COA) og mga dokumento pagpatin-aw sa kuwestiyonableng transaksiyon sa 2003 nakapasamot kalawom sa gahong nga iyang nahimutangan.
Ang pasiunang mga lakang ni Ouano pagtabang sa mga biktima sa sunog di madasigon:
• Gipanghatagan niya og hilaw nga bugas ug noodles ang mga biktima bisan sa kasayuran nga wa intawon silay mga kaldero nga kalung-agan ni mga luna nga kalutoan;
• Ang mga putos sa mga hinabang giseguro gyod nga nabutangan sa, nakatag-an mo, dagway sa mayor;
• Gatosan ka mga biktima wa mahakot paingon sa evacuation centers ug gibiyaan nga nangligad sa kadalanan nga gihapinan ra og plastik; ug
• Atol sa unang mga takna sa katalagman, inay pamatud-an sa mga Mandauehanon nga kontrolado niyang sitwasyon, ug nga may igong katakos ang City Hall pag-atiman sa labing batakan nilang mga panginahanglan, sama sa ilang katakos pagpamalit sa deco lamps ug ubang kahimanan nga gihulagway sa COA nga "pag-suik-usik, paturagas ug paugat," ang iyang mga opisyal nagsige na lang hinuon og pangayo og panabang gikan sa pribadong sektor.
Apan si Mayor Ouano nagkinahanglan sa tanang tabang. Di tungod ug alang sa iyang kaugalingon ug sa iyang pamolitika kon dili tungod sa kaliboan ka mga biktima sa sunog nga kinahanglang tabangan, bisan sa gikahadlokang kakuwang sa iyang katakos ug, labaw sa tanan, gugma ug pag-unong nila. Maong di ko mangahas pag-awhag nga sapawan sa pribadong kahugpongan ug ubang local government units ang iyang liderato, o kakuwang ini. Ang angayng himuon sa nagpakabanang mga sektor mao ang pag-awhag niya, uban ang pangaliya nga ning higayona maminaw siya nila, nga di niya usikan kining talagsaong kahigayonan pakigtambayayong sa tanang hingtungdan, apil nang iyang mga kaatbang ug mga gidumtan, pagtino nga makakaon ug mapanalipdan gikan sa sakit ang mga biktima-labi nang huyang nga mga bata ug mga hamtong-sa mosunod nga mga adlaw ug, sa ngadtu-ngadto, makatukod pagbalik sa ilang mga pinuy-anan ug makasugod sa bag-o nilang mga kinabuhi.
Email:
leo_lastimosa@abs-cbn.com