Dihang akong nakita si Rudy "Tatay Opong" Rubi dayong sugod sa "Halad: Sugbuanong Kanta" ni Dr. Jose "Sir Dodong" Gullas ug sa University of the Visayas niadtong Miyerkules sa gabii, nakumbinser na ko nga di kasarangan ang kasinatian nga nagpaabot sa mga nanambong. Si Tatay Opong, alang sa mga batan-on nga wa nang kaabot niya, usa sa labing mabulukon nga mga personalidad sa radyo sa Sugbo. Gawas sa iyang bantogang mga dramang "Bulawan sa Lapok" ug "Bakho sa Kasingkasing", naila sab sa makapahinuklog ug makapatukiki niyang mga komentaryo sa DYLA uban sa nabantog sang Rose "Nanay Osang" Basadre nga naa na ron sa DYHP.
Apan kalit siyang nahanaw sa kahanginan. Ang gihidlaw niyang mga tigpaminaw dugay nga nakakita og hulip sa dakong haw-ang nga iyang gibiyaan. Bisan kaming iyang kaubanan sa buhat, naglisod na pagpangita niya, o bisan sa pakigsulti man lang sa niaging duha na ka dekada. Maong mora kong nakakita og tagulilong pagkakita niya, ug samot akong bilib ni Sir Dodong nga nakaaghat ni Tatay Opong sa pagpakita pag-usab sa publiko.
Si Tatay Opong maoy kamaguwangang anak ni Vicente Rubi, ang bantogan apan sa dugayng panahon napasagdan nga kompositor sa giilang labing maanindot nga awit sa Pasko di lang sa Sugbo kon dili sa tibuok nasud, ang "Kasadya Ning Taknaa." Mao nga samtang iyang manghod maoy nagdawat sa plake ug P50,000 gikan ni Sir Dodong, si Tatay Opong, ug angay lang, maoy nibarug pagluwat og mensahe alang sa ilang banay.
Wa mausab ang iyang tingog-nga gikamingawan pag-ayo sa iyang mga magdadayeg tungod sa maayong pagkasambog nga kalarino, kamahigalaon ug kapintok. Gawas nga puti nang iyang buhok, tuyhad pang iyang panglawas, wa moburot ni modaot. Maong wa ko ganahing mangayo og detalye sa iyang gihunghong nga dugay siyang nasakit. Human sa dugayng pagpakahilom, ug sa bangis nga inhustisya nga nahiagoman sa iyang amahan, akong tan-aw morang kabuthunon si Tatay Opong sa kaliboan og usa ka mensahe nga gihambin sa iyang dughan. Apan, sama sa naandan, nipatigbabaw ang iyang kamakinaadmanon sa iyang luna sa tulomanon, ug igo lang nagpasalamat ni Sir Dodong ug sa ubang mga tigpasiugda.
Pagkahuman sa puno, dasok apan mubo nga tulomanon (usa ka takna ug 20 ka gutlo), di ko mangahas pag-usab apan igo na lang modason sa tukma nga paghulagway ni Tatay Opong: "Matahom kaayong pasundayag, makalingaw, di laay ni puol, maayong pagkahan-ay ang mga awit (kansang kamakahuloganon nahingpit sa mga sayaw) sa mga gipasidunggan (Ben Zubiri, Mariano Vestil ug Rubi).
Samtang natambalan ang akong kamingaw niya, si Tatay Opong nihatag nako, sa makausa pa, og bililhong pagtulon-an: Ang kayano ug kaligdong sa tinguha ni Sir Dodong pagpasidungog sa mga higante sa Sugbuanong awit, gawas nga nakapukaw sa tanlag ug nakahikap sa kaliboan ka kinabuhi, mahimong nakaluwas sab sa nahulga nga arte ug dila.
Email:
leo_lastimosa@abs-cbn.com