Awit ug panahon

Ang bag-ong mga teknolohiya nga mopalili nato sa ugma nihimo sang mas sayon sa paghinumdom sa atong kagahapon.

Tungod sa kahadlok nga maghuot pag-ayong mga tawo, wa mi mahinayon og tan-aw ni Paul Williams sa Waterfront Cebu City Hotel. Nahinugon pag-ayong akong asawa kay iya mang paborito si Williams, sunod lang hinuon ni David Bowie.

Maong nanihapon na lang mi uban sa among mga higala, uban ang panghinaot nga ang kagahob sa konsiyerto kahulipan sa suod nga kulokabildo, taliwa sa nanamilit nang katugnaw sa Pebrero. Samtang lisod tapakan ang haw-ang sa kapakyas pagtan-aw sa linawas sa usa sa labing maayong kompositor sa tanang panahon, ang Internet nakaluwas namo gikan sa hingpit nga pagkailo.

* * *

Ang website ni Williams, mas sayon pangitaon kay sa karaang songhits, gawas nga nagpahibawo sa sunudsunod niyang mga konsiyerto sa Sugbo, Davao, Iloilo ug Manila hangtod sa Valentines Day, naglista sab sa gatosan niya ka mga awit, unsang tuiga sila natagik ug kinsay ubang mga mag-aawit nga nagkanta nila.

Giablihan sa akong asawa ang iyang libreng account sa Pandora (http://www.pandora.com) ug naghimo siya og Paul Williams Radio Station. Sa usa lang ka pamilok, nabati namo sa tumang katin-aw ang labing halandumong mga awit ni Williams ug susamang mga kanta (ang lisensiya sa Pandora nagdili nila pagtokar og sunudsunod nga kanta sa usa ka mag-aawit) ug gibahaan ang kabos namong panimay sa bulawanong mga handumanan sa among kabatan-on.

* * *

Kon gusto kang maminaw sa lunlon mga kanta lang gyod ni Williams, mahimo kang magpalaban sa daghang P2P (peer-to-peer) websites sama sa Limewire, Ares, Donkey, Gnutella ug daghan pang uban. Labihang paspasa sa download sa imong mapiliang mga kanta apan lalisunon pang legalidad sa ilang teknolohiya.

Mas luwas lang gyod gihapon ang pagpalit og CDs. Nga mao nay nipuli sa kaniadto plaka ug cassette tapes. Kon di na kang kapaabot sa imong order pinaagi sa Amazon o E-bay, mahimo kang moadto sa record bars sa shopping malls. O sa naandang pagpaminaw sa lokal nga radio stations nga nag-promote sa konsiyerto.

* * *

Apan pagpahinumdom ba kaha nga di pa angayng tugyanan sa hingpit nga pagsalig ang bag-ong teknolohiya, kalit lang nipid-ok ang among PC, nipito nga morag nitiyabaw ug wa na moandar og balik. Gawas nga di na ming kapaminaw ni Williams, di sab kong kasuwat ning akong lindog kay hapit nang Santos nga Misa ug wa na koy panahon pag-ayum-ayom sa PC.

Salamat sa bag-ong teknolohiya, ang akong asawa dali rang nakalimot ni Williams kay nalingaw nang Bowie ug Bamboo ug sa TV series nga Criminal Minds sa iyang ipod. Ug gisuwat ug gi-email ni nako pinaagi sa akong telepono.

* * *

Email: leo_lastimosa@abs-cbn.com