Paugat ni Oliva

Ang Cebu City Federation sa Parents-Teachers-Community Association (PTCA) di na moila ni Dr. Leonilo Oliva isip Cebu City Schools Division Superintendent. Adto na sila makiglambigit sa bag-ong gitudlong superintendente nga si Dr. Lorna Rances. Si PTCA Federation President Michael Guerra nitawag sa Arangkada sa DYAB Abanate Bisaya aron pag-awhag ni Oliva sa pagtuman na intawon sa sugo ni Education Secretary Jesli Lapuz, nga giluwatan sa niagi pang tuig, nga nagbalhin niya ngadto sa Lapulapu. Sa ato pa, si Oliva mahimo na lang pahoy. Samtang nagpaugat pagpilit sa katungdanan, labay-labayan lang ug di na siya ilhon sa mga magtutudlo ug mga ginikanan ug ni Mayor Tomas Osmeña ug ubang kadagkoan sa dakbayan. Ang kaikog (o katalawan) na lang ni Regional Director Carolino Mordeno sa Departmento sa Edukasyon (DepEd 7), kay wa pa may temporary restraining order nga giluwatan ang hukmanan, maoy nakapugong sa iyang pagkatangtang.

* * *

Ambot kanus-a pa makamatngon si Oliva nga nag-anam kalawom ang gahong nga iyang nahimutangan. Samtang sayon ra untang kapanalipdan ang iyang pagtugot sa Oasis of Love (OL) pagpasiugda og Life in the Spirit Seminar (LSS) sa mga eskuylahang publiko, ang iyang postura human niulbo ang eskandalo sa LSS sa Abellana National School (ANS) nga labaw sa iyang katungdanan pagpatigbabaw sa mga lagda sa kagamhanan ug bisan sa OL, personal niyang interes diay maoy palabihon:

• Iyang gipasagdan ang mga tinun-an sa ANS nga namasangil nga gibinastosan sa pari nga nagpakumpisal nila, wa gani pahibaw-a ang Department of Social Welfare and Development (DSWD) labot sa insidente;
• Ang iyang pagpabor sa OL nisangpot sa mga pasangil nga nitabang siya pagtabon sa ngan sa pari ug sa pagtuon sa National Bureau of Investigation (NBI) sa posibleng pagkiha niya og obstruction of justice uban nilang Nonito Limchua sa OL ug Ernesto Jacel sa ANS; ug
• Samtang siyay nakauna og kiha nilang Lapuz ug Mordeno, mahimong siyay maputos sa mga kaso kon padayong dumalahon ang mga transaksiyon alang sa Cebu City Division ug pasagdan ang iyang bag-ong buhatan sa Opon.

* * *

Sa kasamtangan, abunda ang mga leksiyon nga makat-onan, apan hinaot di sundon, sa mga tinun-an nga naghangad ni Oliva isip usa sa labing taas nga haligi sa edukasyon sa Sugbo:
• Ang mga mithi sa kaligdong alang lang diay sa lectures sa values formation ug mahimo nang isalindot sa tinuod nga kinabuhi;
• Mahimo diayng isakripisyo ang kamatuoran kon ang pinalabi nang relihiyusong kahugpongan maoy maig-an;
• Mahimo diayng yatakan ang balaod ug isnabon ang mga tigpatuman niini kon personal nga interes nay maapiki; ug
• Ang pagpabaga maoy labing epektibong panagang kon mawad-an na sa tanang lehitimong mga paagi ug argumento pagtabon sa makauuwaw nga mga bulilyaso.

* * *

Email:[email protected]