Kilkil sa summit

Nahadlok kong di na sab mahinayon ang Asean Summit nga nauswag niadtong Disyembre apan gikatakdang ipahigayon na gyod dinhi sa Sugbo karong buwana. Way bagyo nga gitakdang di moigo sa Sugbo unya sa Enero 10-15, busa di na ni magamit nga lusot sa National Organizing Committee. Gituohang patay nang lider sa Abu Sayyaf maong nitidlom ang kahigayonan nga mga terorista na say dudahang makapakakak sa mga tigpasiugda.

Apan mahimong ang mga pangu na sa gyod sa napu ka mga sakop sa Asean ug sa unom nila ka dialogue partners maoy mangunay pagkanselar sa summit. Kon ilang mahibaw-an, ug kon di dayon mabaraw sa nasudnong kagamhanan, ang gipasangil nga bantang nga pagpangurakot sa P89 milyones nga proyekto pagpanaod sa surveillance cameras sa kadalanan nga ilang agian atol sa summit nga gikahadlokang makabuslot ug makapahuyang sa ilang seguridad.

* * *

Ang kapolisan nagkinahanglan og 40 ka surveillance cameras alang sa kritikal nga mga bahin sa kinatibuk-ang ceremonial route gikan sa Marco Polo paingon sa Shangrila nga nitabas sa tulo ka mga dakbayan sa Sugbo, Mandaue ug Lapulapu. Ilang gipangayo ang cameras nga makapada og mga hulagway nga 30 frames per second (FPS) nga susama sa imong makita nga salida sa sine ug telebisyon.

Salamat sa Bagyong Seniang, nakalingkawas ang Pilipinas sa higante ug makauuwaw untang bulilyaso.

Kon nahinayon pang summit sa niaging buwan, buta unta ang kapolisan, wa unta silay katakos sa pagsuhid sa kinatibuk-ang ruta nga makatabang nila pagtino sa kaluwas ug sa pagbadlong sa labing daling panahon sa bisan unsang hulga batok sa heads of state ug ubang mga delegado. Gipasanginlan ang Department of Public Works and Highways (DPWH) nga nabulilyaso sa pagduma sa subasta ug pagpatuman sa proyekto tungod sa ilang pagpangilkil sa nangapil nga mga kompaniya.

* * *

Si Crisologo V. Saavedra sa Pelican/Cebesos Group, ang nakadaog sa subasta sa proyekto, niluwat sa mosunod nga seryusong mga pasangil atol sa iyang pagtambong sa Arangkada sa DYAB Abante Bisaya:

• Ang terms of reference nga gisugyot sa PRO 7 gisapawan sa Triton Communications sa ilang kaugalingong mga lagda nga kinopya ra gikan sa Motorola;

• Gipangayoan siyang DPWH 7 Asst. Regional Director Marlina Alviso og 15% nga komisyon alang nilang Regional Director Robert Lala ug ubang labaw sa DPWH;

• Kay wa man siya modugo, nagdumili si DPWH Maintenance Chief Pureza Fernandez pagdawat sa 40 ka cameras nga iyang gihatod niadtong Nobyembre 20;

• Tungod sa suwat sa iyang abogado, napugos ang DPWH pagdawat sa cameras niadtong Nobyembre 28;

• Gitawagan siyang Alviso pagka sunod adlaw, Nobyembre 29, nga gikanselar nang iyang kontrata ug ang Triton nay mo-suplay sa cameras; ug

• Ang cameras nga nataod sa Triton di kahatag og real-time images kay makapada lang og 15 FPS.

* * *

Email: leo_lastimosa@abs-cbn.com