Karon nga ang National Bureau of Investigation (NBI) nay mobanos pagduma sa imbestigasyon sa pasangil sa babayeng mga tinun-an sa Abellana National School (ANS) nga gibinastosan sila sa usa sa pito ka pari nga nagpakumpisal nila kapin na sa usa ka buwan ang nilabay, seguro na gyong mailhan ang pari ug mapasakaan sa tukmang mga kasong kriminal. Dakong opisyal sa NBI nitug-an sa DYAB Radyo Patrol nga sayon rang ilhon ang hingpit nga ngan ni "Fr. Ben" nga wa kinahanglana nga modangop pa sila sa paghimo og cartographic sketch nga mas makapanlipaghong sa dagway sa pari ug sa Simbahang Katoliko.
Liwas sa pasko, ipatawag dayon sa NBI ang tanang may kasayuran labot sa kaso. Gawas sa kadagkoan sa ANS ug sa Oasis of Love (OL), nga maoy nagpasiugda sa nabulilyaso nga Life in the Spirit Seminar (LSS), mahimong ipatawag sab sa NBI si Junrey Nadela sa ABS-CBN News nga maoy labing unang nipabuto sa eskandalo pinaagi sa TV Patrol Central Visayas.
Napugos ang Department of Social Welfare and Development (DSWD 7) pagtunol sa kaso ngadto sa NBI human sila isnaba sa kadagkoan sa OL, nga maoy nangimbitar ug gituohang nakaila sa gipasanginlang pari, ug sa Artsidyosesis sa Sugbo, nga gituohang maoy labing nahibawo hain karon magtago ang pari. Di kapasanginlan ang DSWD 7 nga nanglaktod, gani gisaway pa man sila nga morang nagpakiluoy sa mga hingtungdan tungod sa tinguha pagtiti sa tanang makiangayong paagi paghusay sa kontrobersiya sa labing daling panahon.
Mas sayon ra untang trabaho sa DSWD 7 kon nakahukom pa lang ang tanang babayeng mga tinun-an nga nangangkong gibinastosan sa pari sa pagpasaka og kaso. Apan mayoriya nila di na mokiha. Ang upat nga determinadong mopasaka og kaso bukas sab sa kahigayonan pagpasaylo sa pari kon mopakita sa publiko, moangkon sa iyang nahimong krimen ug mangayo og pasaylo.
Maong naaghat ang mga imbestigador sa DSWD 7 nga gipangulohan ni Cebu City Councilor Gerardo Carillo pagpatawag sa gilangaw nga tigom gahapon.
Gawas sa pagtino sa kaso o mga kasong criminal nga ipasaka batok sa pari, ang NBI motino sab may sukaranan bang pagpasaka og kasong obstruction of justice batok sa kadagkoan sa OL ug sa simbahan nga gipasanginlang nagkonsabo pagtago sa gipasanginlang pari. Dako ang kahigayonan nga di lang si "Fr. Ben" ang magkapuliki og panagang og mga kaso sa bag-ong tuig.
Samtang gitunol nang kaso sa NBI, wa pa mahuman ang pagtabang sa DSWD sa mga biktima. Matod ni Jaybee Carillo, tigpamaba sa DSWD 7, magpadayon ang ilang counseling sa mga bata aron nga hingpit silang makalingkawas sa trauma sa pait nilang kasinatian nga, kon di matarung pagpasabot, mahimong moaghat nila sa di na pagtahud sa kaparian ug sa simbahan.
Email: leo_lastimosa@abs-cbn.com