Labing sad-an

Ang sukdanan sa usa ka ligdong nga tawo dili nga wa gyod siya mahagba, kon dili ang iyang katakos pagbangon-ug pagkat-on og leksiyon-sa matag kahagba. Nahadlok kong namayabas si Mandaue City Mayor Teddy Ouano dihang gitudlo sa iyang tulonghaan kining maong pagtulon-an. Kay human siya nalutsan sa mega shabu laboratory, nalutsan na sab og mas duguon pang katalagman.

Nakabuylo ang mga durugista pagtukod ug pagpalihok sa labing dakong laboratoryo sa shabu sa tibuok Asya sa tugkaran ni Mayor Ouano tungod sa iyang kapakyas pag-inspeksiyon sa mga bay patigayon nga gihatagan og permiso sa iyang buhatan. Duha ka tuig human sa eskandalo, natay-og ang mga Sugbuanon sa labing sipa nga pag-ulbo, nga gikan gihapon sa tugkaran ni Ouano. Ang hinungdan? Nakatag-an mo, ang kapakyas lang gihapon niya pag-inspeksiyon sa bay patigayon nga iyang gihatagan og permiso.

* * *

Apan sama sa iyang bulilyaso sa mega shabu laboratory, nisuway na sab si Mayor Ouano paglusot sa labing bag-o niyang pakauwaw. Nakapait kay sama sa iyang pagkasangit sa unang kontrobersiya, nagkabulingit na sab sa iyang pagsuway pag-ikyas ning uwahi niyang bulilyaso.

Nanghunaw siya sa mega shabu laboratory niadto pinaagi sa pag-ingon nga ang kapolisan maoy nagpabaya. Apan nabunggo siya dihang nabisto nga kon naka-inspeksiyon pa lang unta ang mga departamento ubos sa iyang buhatan, masakpan untang mga durugista bisan nanghagok pang kapolisan.

Sa kaso sa Gene's Laundry, nagpa-pogi siya sa pagdeklarar nga nihupas nang business permit niini ug busa angay'ng multahan, kon di man hingpit nga tak-opan. Ang wa niya hisguti mao nga iya ning gihatagan og business permit niadtong Marso bisan wa ma-inspeksiyon, wa gani niya pahibaw-a ang kabomberohan nga makabadlong unta sa sayop nga pagkabutang sa niulbong tangke sa LPG ug kalikayan unta ang wa kinahanglana nga katalagman.

* * *

Ang abogado ni Mayor Ouano, nga maoy iyang gisugo pag-imbestigar sa unang bulilyaso, niawhag niya pagsuspenso sa department heads nga napakyas pag-inspeksiyon sa bodegang nahimutangan sa shabu lab. Apan gipatigbabaw ni Ouano ang iyang kasuod sa nagpabaya nga mga opisyal kay sa pagsilot sa makauuwaw'ng kalapasan.

Maong di ikahibung nga samang mga departamento ang napakyas pagtuman sa ilang mga gimbuhaton ning lain na sang pakauwaw. Ug bisan sa kamatayon sa duha ug pagkaangol sa laing dul-an sa 20 ka inosenteng mga biktima sa iyang pagpabaya, tanang tilimad-on nagpakita nga wa lang gihapoy masilotan. Di katabang sa kawsa sa kaangayan nga ig-agaw niyang tag-iya sa Gene's Laundry. Nagduda hinuon ko nga di gyod takos si Mayor Ouano pagpatuman sa mga lagda. Kay labaw sa iyang pamostura mao ang naghingaping kahadlok nga siyay labing unang masilotan kay siya ang labing dako og atraso.

* * *

Email:[email protected]