Hagbong sa pagsuway

Kon tinuod man ang mga pangandak nga ang pag-ulbo sa tangke sa LPG sa Basak, Mandaue niadtong Lunes sa buntag usa ka mahinungdanong pagsuway sa katakos ug kaandam sa kapolisan ug kagamhanan pagtubag sa susama o mas dagkong alarma sa pagpahigayon sa ASEAN Summit nga dumalahon sa Sugbo karong Disyembre, masulub-on kong mopahibawo nga dakong itlog ang grado nga ilang nakuha, higanteng pakauwaw ang ilang gihimo ug kabantang diay sa Sugbo sa mga pangatake bisan sa lahap nilang panghambog.

Kon pasikaran ang kataphaw ug kalangay sa tubag sa kapolisan ug ubang ahensiya sa kagamhanan sa pagkamatay sa duha ug pagkaangol sa dul-an sa 20 ka mga biktima tungod sa aksidenteng pag-ulbo, manguros na lang tang daan unsay mahitabo kon, simbako layo ra to ug tabukon ug pito ka lawod, magkinuwanggol gyong mga terorista paglusad og mas bangis nga mga pagpamomba atol sa pagtapok dinhi sa mga lider sa Estados Unidos ug ubang kanasuran.

* * *

Mas dako pa og buslot kay sa nagusbat nga GJDIF building, nga maoy nahimutangan sa niulbong Gene's Laundry, ang katakos sa kapolisan pagtubag sa dinaliang mga alarma. Naandan na sa mga Mandauehanon nga biktima sa krimen nga mag-rosaryo una og kasiyam una matabang sa kapolisan. Tungod sa kadako sa panghitabo niadtong Lunes, nabisto na gyod sa kadaghanan unsa kapulpol ang kapolisan.

Wa katabang sa kapolisan ang pagpangiyugpos lang ni Mandaue City Mayor Teddy Ouano sa ka-wa nilay sakyanan (kinahanglan unang mobanaw ang dugo una napugwat si Ouano sa iyang dakong sayop ug nisugot nang ibalik ang inabangang mga Terrano sa RDAK karong Lunes), ang pagdestino sa kasagaran sa mga polis pagbantay sa dagkong mga politiko nga nanambong sa AIPO General Assembly sa Sugbo ug ang hingpit nga pagkabara sa trapiko.

* * *

Dugay nang nahibawo ang mga Mandauehanon sa kabanga sa Tedman. Niadtong Lunes pa nalili sa kinabag-an sa mga Sugbuanon nga tinuod gyod diay nga ang Tedman makapasamot, di makahapsay, sa kahuot sa trapiko. Ang nagkadugo nga mga biktima mao na lay naninguha pagpara og mga sakyanan nga makada nila sa ospital kay way nakalusot nga mga ambulansiya ug layo pa kaayong nagbaktas nga mga polis.

Salamat sa di masabot nga burukrasya sa kapolisan, nga di matandog ang dapit nga nahitaboan hangtod nga moabot ang kanunay'ng mangiwit nga scene of the crime operatives (SOCO), ang patay'ng lawas ni Diosdada Jao nagbad-ay sa taliwa sa Cebu North Road sud sa pila ka takna, wa dayon mailhi, gitabonan lag nilupad nga sin.

Ug si Mayor Ouano? Dugay nang nahibawo ang mga Mandauehanon sa iyang taphaw'ng pamolitika. Apan niadtong Lunes nahukasan na gyong nangalisbo niyang liderato-ang ERUF (nga iyang gigukod), di ang ACERT (nga iyang tinukod), maoy nakatabang sa mga biktima ug ang mayor nagdumili pagduol sa niulbong building kay, nakatag-an mo, gipanag-iya sa iyang kaatbang.

* * *

Email: [email protected]