Insulto sa Nursing

Haskang paita sa Professional Regulation Commission (PRC). Inay maningkamot paghaw-as sa propesyon sa nursing, nagpadayon na hinuon pagmudmod ini ngadto sa mas nangalisbong tunaan sa kauwawan. Wa pa gani mahuman ang pakisusi unsa gyod kalapad ang leakage sa pasulit niadtong Hunyo ning tuiga, ug bisan nagkayamukat pa ang Board of Nursing (BON), si PRC Chairperson Leonor Tripon-Rosero namugos na sab nga ipahigayon ang laing pasulit sa lab-as nga hut-ong sa mga gradwado sa nursing karong Disyembre.

Bakante karon ang tanang lingkoranan sa BON human nang-resign ang pito ka mga sakop tungod sa leakage. Sa sayo pa, ang duha nila-Anicia Dionisio ug Virginia Madeja-gipangsuspenso kay ang ilang giandam nga mga pangutana naapil sa nasakpan nga leakage. Ang labing sipa nga sagpa nga napakyas pagpugwat ni Rosero gikan sa iyang pangugat nga kontrolado niyang sitwasyon mao ang pagdumili sa tanang 33 ka nurses ug nursing professors pagdawat sa iyang pagdapit paglingkod sa BON.

* * *

Ang sulbad nga gisugyot ni Rosero nga maoy gipasikaran sa iyang pasalig nga wa nay tikas sa pasulit karong Disyembre: Magsuhol siya og "test item writers" nga mahimong di nurses aron pag-andam sa 2,500 ka pangutana nga maoy pilian alang sa pasulit sa Disyembre.

Mao ray gidangat. "Test item writers" na lang ang mosukod unsa kahaom ang atong mga gradwado sa nursing pagpraktis sa ilang propesyon. Gawas nga kadudahan duna ba silay "technical know-how" pag-umol sa labing haom nga mga pangutana, wa say garantiya nga di sila kasuburnohan aron mosabwag na sab og mas daghan pa hinuong mga pangutana ngadto sa hakog nga review centers ug mga tulonghaan (31 ka nursing deans ang gidudahang nakapahimus sa leakage).

Kon tinuod nga natental ang duha ka sakop sa BON sa P7 milyones nga gibundak sa ilang atubangan, unsa may ikapanagang sa "writers" ni Rosero?

* * *

Ang laing kaaway sa binuang ni Rosero mao ang panahon, o ang kakuwang ini. Unom ka buwan ang gikinahanglan sa pagpangandam sa board exam. Tungod sa eskandalo, tungod sa wa pa mahuman nga imbestigasyon, tungod sa nag-ung-ong nga kaso sa Court of Appeals (CA), ug tungod sa napapas na nga BON, nagkaupos nang lugway sa pagpangandam. Apan niinsistir si Rosero nga mahimo ni sa iyang "writers" sud lang sa usa ug tunga ka buwan pinaagi sa paghimo og tag-napu ka pangutana sa mosunod nga 50 ka adlaw.

Ang kusganong pagdumili ni Rosero pag-angkon sa dakong problema maoy labing dakong babag sa kasulbaran. Ang iyang pagpakaaron-ingnon nga gamay rang sipyat ang nahitabo maoy hinungdan sa iyang pag-umol og taphaw nga mga lusot nga inay makatabang makadaot na hinuon sa inosenteng mga biktima sa leakage ug sa tanang hingtungdan-gawas lang sa iyang paboritong mga sungayan nga nagpasiugda sa eskandalo.

* * *

Email:leo_lastimosa@abs-cbn.com