Kay di man mahitabo nga makumbinser ni Pres. Arroyo ang Senado pagtubok ug pagpapas sa iyang kaugalingon, ang bugtong paglaom sa Malakanyang nga magpadayon ang charter change mao ang iyang mga tinudlo sa Korte Suprema. Sila na karoy mayoriya sa labaw'ng hukmanan. Wa nay makababag kon ilang balihon ang baruganan sa karaang mayoriya sa mga maghuhukom nga wa pay balaod nga napasar ang Kongreso pagpalihok sa probisyon sa batakang balaod nga naghatag og katungod sa katawhan pagpasiugda og kausaban sa konstitusyon pinaagi sa people's initiative.
Apan makaako bang labaw'ng hukmanan pagpakauwaw sa ilang kaugalingon? Andam bang mga maghuhukom paghiklin sa tanan nilang kaligdong aron pagbayad sa utang kabubut-on nila sa presidente nga maoy nitudlo nila sa katungdanan? Mangahas ba sila pagbuong sa kadungganan sa kinatibuk-ang institusyon aron lang pag-ulog-ulog sa usa ka politiko ug iyang hangol nga mga hinanib nga naghigwaos paggamit sa tanang matang sa makauuwaw'ng paugat aron lang magpabilin sa gahom?
Samtang giila na sa National Bureau of Investigation (NBI) ang nursing review centers nga nanghatag sa mga pangutana sa pasulit niadtong Hunyo ning tuiga ngadto sa ilang mga tinun-an, ang Malakanyang nanghunaw nang daan. Ang pag-angkon ni Executive Secretary Eduardo Ermita nga lisod ang paggukod sa badlungong review centers tungod sa kakuwang sa mga balaod nga nagduma sa ilang operasyon maoy pasiuna sa gikahadlokang pagkahilom lang sa kontrobersiya sa leakage sa nursing board exam nga way bisan usang masilotan ni makahuloganon ug malungtarung kausaban nga mapatuman.
Ang NBI mismo bakikaw ang kahimtang. Nahilambigit sila sa matag lakang sa kinatibuk-ang proseso sa pasulit di lang sa nursing kon dili apil na sa ubang propesyon nga giduma sa Professional Regulation Commission (PRC). Ang ila karong pag-angkon nga dunay leakage nga naglambigit sa pipila ka review centers, nga kasagaran tua mahimutang sa Luzon, maoy pagkumpisal nga napakyas sa ilang gimbuhaton pagbantay sa pasulit.
Kuyaw pa gani kon isimang sa NBI ang imbestigasyon aron pagpahiyos sa ilang papel sa eskandalo, kay imposible mang may makalusot nga mga pangutana kon wa sila molingiw o aktibo gyong nakigkonsabo sa mga utok sa gidudahang multi-milyones pesos nga raket.
Ang mga Sugbuanong nakapasar sa nursing board exam niadtong Hunyo nagsugod na paghikay sa mga panginahanglan sa ilang pagkuha sa NCLEX aron pagtuman sa ilang damgo pagtrabaho sa Estados Unidos. Sukwahi sa pasidaan sa consultant ni Pres. Arroyo nga maglisod sila pagtrabaho sa gawas tungod sa eskandalo, ang bag-ong nurses niingon nga wa sila lisudlisora sa mga ahensiya nga ilang gi-aplayan.
Atol sa Kapamilya Media Forum sa DYAB Abante Bisaya ug Sky Cable nga gihimo sa SM City Cebu, ang board passers nipasabot nga di kahakog ang nagtukmod nila pagawas kon dili ang gagmay nilang suholan dinhi ug ang panginahanglan sa mas sanag nga kaugmaon sa ilang pamilya.
Email:
leo_lastimosa@abs-cbn.com