Gusto kaayong maghuwes

Nalipay ko kay daghan pa g'yod diay'ng mga abogado nga gustong maghuwes karong panahona aron ipatigbabaw ang hustisya.

Tiaw mo 118 ang miaplay aron matudlo nga huwes sa duha ka sala sa Regional Trial Court diha sa Palace of Justice ning dakbayan sa Sugbo.

Ang nakanindot kon daghan ang moaplay pagka huwes kay makapili g'yod pag-ayo ang mga sakop sa Judicial and Bar Council kon kinsa ang ilang irekomendar ngadto sa Malacañang.

Ang record sa JBC nagpakita nga 59 ka abogado, pipila niini mga huwes na sa Municipal Trial Courts - ang miaplay pagka huwes sa RTC branch 6 nga gihuptan kaniadto sa mi-resign nga si Judge Anacleto Caminade.

Susama nga gidaghanon ang miaplay sa pagka huwes sa RTC branch 5 nga mabakante sugod karong Septembre 20 kon si Judge Ireneo Lee Gako Jr. moretiro na sa serbisyo.

Usa ka higala nato sa JBC mibutyag nga gihashasan karon pag-ayo kon kinsa sa mga aplikante ang itudlo sa maong mga sala sa RTC, kana g'yong kasaligan ug balaod ra ang ipatigbabaw.

Abi ninyo, dalaygon kaayo kadtong mga abogado nga gustong mag-huwes kay dili kaayo daku ang sweldo sa usa ka judge kon itandi sa makwarta sa mga abogado kon anaa sila sa private practice.

Nindot kaayo kon kini unta maoy tinuod nga rason niadtong buot nga mag-huwes. Maayo unta og sayop ang pagtoo sa uban nga kadaghanan niining maong mga abogado maghuwes na lang kay minus ra og kliyente.

Kadtong mga abogado nga magtoon g'yod sa ilang kaso, siguradong ponsisokan g'yod sa mga kliyente. Nakabantay g'yod ko nga ang ubang abogado anha na magtoon sa ilang kaso sa korte.

Resulta, dali ra kaayo sila nga sapotihon sa mga kaatbang nila nga abogado nga nagtoon g'yod sa ilang mga argumento.

* * *

Ang argumento sa mga tagdumala sa Norkis sa pagpadiki-diki nila pagtugyan pagbalik ngadto sa kagamhanan sa Mandaue sa yuta nga ilang giabangan og P1,000 ang tuig kay ang maong luna kuno, gipanag-iya sa nasudnong kagamhanan.

Layo ra kaayo kining ilang argumento sa tinuoray'ng isyu. Ang isyu mao nga gilapas nila ang nabutang sa kasabotan nga gipirmahan nila ug sa mga opisyal sa Mandaue.

Gibutang sa kasabutan nga ang yuta nga ilang giabangan og P1,000 ang tuig, butangan unta og mini-park apan gihimo hinoon nila nga display center sa ilang mga produkto. Faet!

Alang ni Mr. Norberto Quisumbing, ang "Haring Gangis" sa Norkis, maayo na lang nga iuli nimo sa Mandaue ang luna kay aron katukoran kini og National High School.

Kon padayon ninyo nga huptan para sa inyong negosyo ang katigayonan sa gobyerno Mr. Quisumbing nga giabangan ra nimo'g barato aron butangan og mini-park, tabla ra og gipahimuslan nimo ang kahigayonan.

Angay nimong huna-hunaon nga kon itugyan nimo pagbalik sa Mandaue ang maong luna, unya matukoran kini og tunghaan, daghang mga anak sa taga Mandaue nga makapahimulos.

Kon magpadiki-diki ka pag-uli sa maong luna ngadto sa Mandaue Mr. Quisumbing, malagmit nga mausab ang pagtan-aw sa taga Mandaue kanimo.

* * *

Ang pag-isyu og armas ngadto sa mga sakop sa Barangay Intelligence Network kon mga confidential agents sa kapolisan nga anaa gidistino pagbantay sa City Hall, dakung sayop kay wala sila'y lisensya pagka gwardya.

Dili sila mga direkta nga kawani sa City Hall ug wala sila mag-agi og Pre-Licensing Training pagka security guards nga maoy basihanan nga maisyohan sila og armas nga gikan sa kagamhanan.

Lahi sa mga sakop sa Civil Security Unit nga mga kawani sa City Hall nga naghupot og lisensya pagka gwardya. Akong balikon, illegal ang paghupot og armas bisan sa mga opisyal sa City Hall nga gigamitan lang og Memorandum Receipt.

Kon ila hinoon ang armas, unya dunay lisensya ug may Permit to Carry Firearms Outside Residence (PTCFOR), aw legal ang ilang paghupot og pagdala-dala sa armas.

Daghan man og mga abogado ang City Hall, estudyohi ninyo ang lagda sa Firearms Law.

Nabantayan na man god sa mga reporters nga ang ubang sakop sa BIN nga anaa gidistino sa City Hall, migara na sa pagpabagal-bagal og armas diha sa ilang mga hawak.