Baha sa tikas

Ang promosyon sa mga batabata ni kanhi Comelec Commissioner Virgilio Garcillano atubangan sa mga pasangil nga silay nagpadaog pinaagi sa tikas ni Pres. Arroyo sa eleksiyon niadtong 2004 maoy di malalis nga tilimad-on sa paghukas na sa Malakanyang sa tanang salimbong sa kaikog tungod sa nituyhakaw na pag-ayo nilang kamasaligon nga, bisan sa lab-as nga impeachment complaint sa Kongreso pinasikad sa nagbuntaog nga mga ebidensiya ug bisan kon ang kinabag-an sa katawhan padayong nagtuo sa mga pasangil sa pagpanikas, pagpamakak ug pagpangawat, magpabilin ang presidente sa katungdanan, salamat sa mapahimuslanong mga heneral sa militar ug kapolisan ug sa nagkatibuwaag nga mga obispo ug mga pundok sa oposisyon.

Mahimong di na gyod kapugngan ang paghupot og mas dagkong katungdanan nilang Rey Sumalipao, Renato Mabutay, Francisco Pobe, ug Renault Macarambon. Ug kon tinuod ang pasangil nga nakigkonsabo sila ni Garcillano pagbukubuko sa mga botante, kahatagan na unya sila og mas lapad nga gahom paghimo og mas makalilisang nga mga milagro ug mas makagusbat nga mga katalagman.

* * *

Ang turutot nga mga kongresista dunay andam nga panagang sa ilang pagduso nga palutson dayon sa Commission on Appointments (CA) ang ilang paboritong mga opisyal sa Comelec: Wa kapamatud-i ang mga pasangil batok nila. Sayon kaayo nilang nakalimtan paghisgot nga sila ra say nagluok sa tanang lehitimong kahigayonan nga mapresentar ang kinahon nga mga ebidensiya ug nagkataas nga listahan sa mga saksi pinaagi sa pagbaraw sa niaging tuig, nga way kukauwaw nga gitataw nga banhawon na sab karong tuiga, sa impeachment process.

Tak-om na si Garcillano. Luwas nang presidente. Apan tinuod gyod tingali nga way kinutoban ang kahakog sa gahom. Wa matagbaw ang Malakanyang nga nakalingkawas ang presidente gikan sa makauuwaw nga pagkalagpot sa katungdanan. Kinahanglan pa nilang gantihan ang tanang nakatampo sa pagsakmit og lab-as nga termino-gi-promote di lang ang mga hinanib ni Garcillano kon dili hasta sab ang bag-ong hepe sa Armadong Kusog nga si Heneral Hermogenes Esperon.

Gisukod nila asa kutob ang utong ug pailob sa katawhang ilang gibudhian.

* * *

Human sa nabistong leakage sa nursing board examination niadtong Hunyo ning tuiga, nitiyabaw na sang Dakbayan sa Sugbo nga gitikas ang labing uwahing National Achievement Test (NAT). Kini samtang nagpadayon ang imbestigasyon sa Cebu Provincial Schools Division sa giingong kalambigitan sa kadagkoan sa mga eskuylahan sa pipila ka mga lungsod sa amihanang Sugbo sa pagpanghatag og kodigo atol sa Regional Achievement Test ug Division Achievement Test (RAT-DAT) aron modagko ang grado sa mga tinun-an, nga gipanghinaot nga mopadako sab sa performance rating sa mga magtutudlo.

Unsay kalainan sa pagpanikas sa board exams, o NAT, o RAT-DAT gikan sa pagpanikas sa eleksiyon? Ang tikas sa pasulit nakabuong sa kaligdong sa sistema sa edukasyon. Ang tikas sa eleksiyon maoy pagpanamastamas sa demokrasya.

* * *

Email: [email protected]