Lama sa pagduda

Way Sugbuanon nga sakop sa Board of Nursing (BON) nga nagduma sa kontrobersiyal nga nursing board examination niadtong Hunyo ning tuiga. Kon ang kaligdong sa mga Sugbuanong kanhi sakop sa BON ang pasikaran, di gyod unta molampos ang palusot kon apil pa silang nagbantay. Sila si Dr. Delia Mediano (1990-1992) ug Shirley Alinsonorin (1990-1998) di nang kaihap sa gidak-on sa kuwarta ug pila ka higayon nga gisuwayan sila og suburno sa dakong negosyo sa leakage sa board exams.

Dihang ilang gibalibaran ang mga tanyag-nga kasagaran gipaagi sa ilang mga kawani-gisunudsunod sa wa mailhing mga tawo ang ilang gisakyang taxi o PUJ sa kaulohan ug gipanghulga ang ilang kinabuhi. Si Alinsonorin niingon gipataktak niyang iyang mga kawani nga napamatud-ang nakigkonsabo sa mga nisuway pagsabotahe sa board exam.

* * *

Si Dr. Mediano nga nahimong chairperson sa BON sa iyang ikaduhang tuig niawhag nga ibalhin ang pagduma sa nursing review centers gikan sa Professional Regulation Commission (PRC) ngadto sa laing ahensiya. Kini aron kalikayan nang dakong tentasyon sa kadagkoan ug mga kawani sa PRC matag pahigayon sa board exam.

Apan silang Mediano ug Alinsonorin nakadayeg sa kaligdong ni Leonor-Tripon Rosero sa PRC ug Eufemia Octaviano sa BON, atubangan sa sibaw nga pasangil sa cover-up, nga nisuspenso dayon sa duha ka sakop sa BON nga gipasanginlan sa leakage-silang Anesia Dionisio ug Virginia Madeja. Ang dakong pangutana kon matagbaw ba sang ilang ikatagbo karong semanaha nga 400 ka nursing deans, nga ang kinabag-an pabor sa retaking inay sa oath-taking karong Agosto 22, sa ilang pagtangtang sa 110 ka pangutana nga apil sa leakage gikan sa pagkuwenta sa scores sa pasulit nga nisangpot nga 17,000 ra (42%) sa 42,000 ka tinun-an nga nagpanon sa 11 ka testing centers sa tibuok nasud.

* * *

Nikisikisi ang R.A. Gapuz Review Center nga gipasanginlang nag-apod-apod sa leakage. Ang ilang CEO nga si Dr. Eleonor Gapuz, kinsa nitambong sa Kapamilya Media Forum sa DYAB Abante Bisaya ug Sky Cable, niingon nga di leakage ang 18 ka pahina nga notes nga ilang giapud-apod, gawas pa gikan ni sa laing review center nga nakuha lang sa ilang reviewee. Matod ni Gapuz dunay laing dokumento nga nakuha ang NBI gikan sa laing review center nga maoy nakapakumbinser sa BON ug sa PRC sa leakage.

Sa ilang pag-apura sa oath-taking, dunay mga ginikanan nga mangugat nga way leakage ug kon duna man didto ra sa Baguio. Apan pasiunang mga ebidensiya nagpakita nga, salamat sa texting ug email, mas lapad ang leakage. Kon papanumpaon ang mga nakapasar bisan wa pa mapapas ang pagduda sa kaligdong sa pasulit, ang 17,000 ka gradwado mahimong maglisod pagkumbinser sa ilang employers nga wa silay apil sa tikas.

* * *

Email: [email protected]