Pukaw sa BFAD

Gawas kon didto ka puyo sa langob sa niaging mga buwan, nakabantay tingali ka sa kalit nga pagsulbong sa industriya sa food supplements dinhi sa Sugbo ug ubang bahin sa nasud. Ang pagpanguhong sa mga patigayon ning maong mga produkto way direktang kalambigitan sa kanihit sa pagkaon. Apan usa sa mga sukaranan mao ang pagtidlom sa nutrisyon ug kalidad sa panglawas ug ang hapit di na maabot nga presyo sa tambal.

Ang labing inilang food supplements gipamaligya nga may pagtugot sa Bureau of Food and Drugs (BFAD). Dunay pipila nga kolorum pa apan nakalusot na sa merkado. Silang tanan gidid-an sa BFAD sa pagpangangkon nga makaayo sa bisan unsang sakit. Gimandoan sila sa pagbutang og ikog sa ilang advertisements: "No therapeutic claims."

* * *

Wa hinuon ni kapugong sa kinabag-an nila pagpahibawo sa katawhan nga ang ilang mga produkto makaayo sa tanang sakit nga nailhan ug bisan sa mga wa pa mailhi-gikan sa kagid ngadto sa kanser, o gikan sa kalisod pagkatug ngadto sa pagkalanday. Aron pagkumbinser sa mga madudahon, nigamit sila og mga konsumidor-ang uban nagpaila ganing mga doktor-sa pagmatuod sa ka-epektibo sa ilang mga produkto.

radyo ug telebisyon, ang uban nila nakapalit na gani og tibuok programa. O tibuok estasyon. Ang nagkalainlaing media organizations nakalitan sa pagbaha sa daghan nilang kuwarta. Ug wa pang kahunat sa pagsusi sa katinuod sa ilang mga pangangkon.

* * *

Nga gimbuhaton sab unta sa BFAD. Apan ang ahensiya nga gitahasan pagtino sa kaluwas sa mga pagkaon ug ka-epektibo sa mga tambal, sama sa naandan, klarong nagduka sa katungdanan. Klarong naghuwat lang nga may mangreklamo na batok sa tupong-na-sa-langit nga mga pangangkon sa mga kapuslanan sa food supplements. O kon duna na man silay nadawat, klarong wa sila mag-apura pag-atiman sa mga biktima. Nag-anam na pagtuybo ang mga pangutana sa mga konsumidor sa kamatinud-anon sa mga propaganda sa media nga ilang nadunggan ug nabasahan. Maong bisan uwahi na mapugos paghupot og mas klarong baruganan ang BFAD ug ang media labot sa kontrobersiya.

* * *

Ang kadagkoan sa Kapisanan ng mga Brodkaster ng Pilipinas (KBP) sa Sugbo makigtagbo sa BFAD aron matuki ang ilang mga lagda. Nagpasalamat ko sa liderato ni Chairman Edward Abad sa pagtuki dayon sa kontrobersiya.

Di sayon ang gimbuhaton sa KBP. Dakong haw-ang sa panudlanan sa mga sibyaanan kon mangluod ang advertisers.

Apan angay silang pahinumdoman nga samtang mahinungdanon ang kuwarta pagbuhi sa industriya, angay gihapong ipatigbabaw ang kamatuoran. Pahinumdom sab sa mga patigayon sa food supplements: Ang katawhan makaamgo ra sa kapulihay nga inyong mga bolsa ray nahimsog sa inyong mga produkto.

* * *

Email:[email protected]