Naglaway sa P8B

Ang matag Overseas Filipino worker (OFW) kinahanglang mobayad og P1,275 sa Overseas Workers Welfare Administration (OWWA) matag gawas niya sa nasud pagtuman sa iyang kontrata. Gamay rang amotan kon itandi sa benepisyo nga iyang madawat. Kon simbako mamatay siya, ang iyang pamilya makadawat og P220,000 nga hinabang. Apan di tanang OFW madisgrasya ug magkinahanglan sa tabang sa OWWA. Sa kataposang ihap niadtong Disyembre 2004, niabot og P8.1 bilyones ang OWWA Fund.

Maong dakong eskandalo nga (1) wa kapangandam ang kagamhanan dihang nag-ung-ong pang dakong krisis sa Lebanon; (2) nibalibad ang Department of Foreign Affairs (DFA) pila ka adlaw human niulbo ang gubat nga way kuwarta alang sa pagpabakwet sa OFWs; (3) nagpakiluoy ang DFA sa US, UK ug ubang kanasuran nga iapil na lang ang mga Pinoy kon may luna pang ilang buses, barko ug ayroplano; ug dihang nakabantay tingali sa ilang pakauwaw, nipahibawo si Pres. Arroyo sa pagpagawas og P150 milyones puno sa pasiunang P26 milyones nga gahin sa pagpabakwet.

* * *

Bisan sa pangandak sa presidente nga palihukon ang tanang kahimanan sa kagamhanan aron mapalingkawas gikan sa gubat ang tanang OFWs, sukwahi ang nakita di lang sa mga Pilipinhon kon dili sa tibuok kalibotan: Ang atong OFWs nagsinardinas sa simbahan sa Miraculous Medal sa Beirut, ang uban nanghigda na gani sa kadalanan ug ang gibisto ni Padre Agustin Advincula, ang Bisaya nga tagduma sa simbahan, nga silay nagpakaon sa natanggong nga OFWs kay way hinabang nga nadawat gikan sa embahada.

Nabungkag ang bay sa lampinig dihang ang atong embahador sa Lebanon, Alfrancis Bichara, niangkon nga posibleng mahunong ang inadlaw'ng pagpabakwet sa OFWs kay hapit na mahurot ang iyang kuwarta ug wa pay lab-as nga pundo nga nahatag ang Malakanyang niya. Buanga god ini! Bisan nag-ungaw na sa kamatayon ang OFWs sa Lebanon, ang gisaad sa presidente nga dugang pundo wa diay kalainan sa dugay-na-niyang-gipanghambog-apan-hangtod-karon-wa-igkita nga binilyon ka pesos nga subsidy sa bugas humay, sardines ug noodles alang sa mga kabos?

Unsay pagtuo sa presidente-masagang sa iyang pagarpar ang mga bombardiyo sa Israel ug Hezbollah?

* * *

Ang pagwarawara sa Malakanyang pilay kuwarta sa atong embahada sa Lebanon-P900,000 nga cash ug P3.6 milyones sa bangko-wa kapapas sa nabantang nilang pagpabaya. Ang karaang pundo sa embahada, bisan duha ka semana na human niulbong gubat, wa pa gyod diay mapun-i. Kay segun pang Budget Secretary Rolando Andaya di pa silang kapada sa bag-ong kuwarta kon may pundo pang embahada.

Unsa may gusto sa Malakanyang, kinahanglang mahatag una ni Bichara ang tanang resibo sa di pa abunohan ang iyang pundo? Nganong ganahan man gyod silang mobangil kon mga kabos nay nagkinahanglan? Nganong sutoy ra mang panglaktod kon mga proyekto na alang sa ASEAN Summit ang gusto nilang palutson?

* * *

Email: [email protected]