Bakak sa gubat

Angay'ng susihon sa pamunoan ni Pres. Arroyo, kana kon tinuod silang nagpakabana alang sa OFWs nga natanggong sa gubat sa Lebanon, ang makahasol nga kasayuran gikan sa labing unang OFW sa Lebanon nga nakauli sa Sugbo. Si Vilma Desabille nahibalik sa iyang pamilya sa Kintarkan, Sta. Fe sa isla sa Bantayan sa Miyerkules pa sa niaging semana, upat ka adlaw sa wa pa motugpa ang 232 ka OFWs nga gihakot og buses gikan sa Beirut ug gipasakay og ayroplano gikan sa Damascus, Syria.

Atol sa exclusive interview sa TV Patrol Central Visayas, si Desabille nipahibawo nga dunay OFWs nga gitanggong sa mga panimay sa ilang Lebanese employers aron di makabiya ug di mahunong ang pangalagad, nga mas gikinahanglan karon tungod sa kalisod ug kaguliyang sa gubat. Hinaot nga ning higayona, bisan tungod na lang sa kakuyaw sa gubat, makaangkon na og igong kaisog ang atong kagamhanan pagluwas sa OFWs ug di na sublion ang naandan nga pagpa-upuy-upoy ngadto sa mga langyaw nga nagpahimus sa atong makaluluoy'ng mga kaliwat.

* * *

Mas palaran si Desabille kay sa ubang OFWs. Sa pagsugod gyod sa binaslanay sa mga bombardiyo sa Israel ug mga rebeldeng Hezbollah, si Desabille gipapauli dayon sa iyang employers aron nga makalikay gikan sa gubat. Ang magtiayon mismo naglaraw sa pagbiyahe paingon sa Australia. Kon makahukom silang di na mobalik sa Lebanon, si Desabille gisaaran nilang pasundon sa Australia aron makapadayon pag-alagad nila didto.

Mas manggihunahunaon ang employers ni Desabille kay sa atong kaugalingong kagamhanan. Wa moulbo sa usa lang ka pamilok ang gubat. Ang unang mga tilimad-on sa kagubot nisugod pagtumaw pila pa ka semana ang nilabay dihang nagkasangka ang mga sundawong Israeli ug ang mga rebelde. Atol sa usa ka pinusilay, nakadakop ang mga Hezbollah og sundawo sa Israel nga ila untang pabayloan sa mga babaye ug mga bata nga gibilanggo sa Israel.

Bisan nibawos nang Israel sa iyang naandang mas dakong bombardiyo, si Pres. Arroyo padayong nangiyugpos. Naghuwat unang kilatan una nanguros.

* * *

Ang Israel, kansang mas gamhanang mga hinagiban nabaid kay pulos niyang kaaway ang naglibot nga mga nasud, napakyas pagpaluhod sa mga Hezbollah. Ang pagsakmit sa mga Israeli sa pipila ka bahin sa Lebanon aron pag-abog sa mga Hezbollah gikan sa ilang utlanan makapasamot sa kaduguon sa duha na ka semanang gubat. Kini bisan sa awhag sa UN ug ubang kanasuran sa dinaliang ceasefire aron katabangan ang inosenteng mga sibilyan.

Apan wa ning kapugong ni Pres. Arroyo pag-angkon nga nipasalig ang Israel sa kaluwas sa OFWs. Kon giisnab sa Israel ang UN, nganong maminaw mang mga Israeli niya? Ug kon ang mga sibilyan sa Israel naunay sa pipila ka nilikoy'ng rockets sa mga Israeli, ang pagpasalig nga luwas ang OFWs di buhat sa kaluoy kon dili usa ka bangis nga bugalbugal.

* * *

Email: [email protected]