Bata sa sako

Daghang nakasaksi sa gihimo sa 17 anyos nga bata sa ilang trabahoan sa New Bago, Asturias nga pagkulata, pagpakaon og iti sa manok, paghilam-os og lapok, pagpakuryente, pagsud sa sako ug paglabay sa 10 anyos nga si Al Quirante Miano ngadto sa suba. Ang ubang mga bata niingon nga wa silang kabadlong sa suspek kay gihulga silang dunggabon. Diha untay dako nga nakakita apan inay mobadlong nitabang na hinuon pagkasaba ug pagtuok sa biktima.

Si Miano gipasanginlan nga nanghilabot sa P70 sa suspek ug dihang nasakpan P10 na lay giuli. Gipasanginlan sab siya sa suspek nga nanguha sa iyang kuwarta sa labing menos duha na ka higayon sa una. Bisan unsa pay atraso sa biktima, di makiangayon ang pagpanamastamas nga iyang nahiagoman. Nga bata say nagpasipala niya nakapasamot sa kahasol nga namugna sa panghitabo.

* * *

Gipasakaan nag kaso ang batang suspek. Ubos sa bag-ong balaod, di siya mabilanggo. Apan hinaot nga ang husay sa kaso makatino unsay nakaaghat sa suspek, unsa may nakadangilag ug nakapalahutay sa iyang kasuko, pagpaantos sa biktima sud sa pila ka takna, nga nakaako pa gani siya pagpakaaron-ingnon nga nakatug makadiyot, sa wa pa tiwasi pinaagi sa pagakot niya sa sako ug paglabay niya sa suba. Ingon ini na ba kabangis ug kaduguon ang atong kaugmaon?

Gisusi na sa Kapitolyo ug ubang ahensiya sa kagamhanan ang aspeto sa pagpatrabaho sa mga bata kay kon napugngan pa tinuod di unta mahitabo ang trahedya. Apan ang mga politiko angayng pahinumdoman nga ang labihang kakabos, nga di mabaraw ug nisamot pa gani hinuon tungod sa ilang pagarpar, ug kon di mapangitaan og sulbad, padayong makapugos sa mga ginikanan pagpatrabaho sa ilang linghod pang mga bata.

* * *

Human sa pila ka adlaw nga pagkawa, gidagsa ang gituohang patayng lawas ni Miano sa isla sa Bantayan. Sud sa sakong wa niya matukas kay ginakotan og alambre, gianod siya og gatosan ka kilometro gikan sa suba sa New Bago ngadto sa Mambacayao, Lipayran, Bantayan. Bisan nakagawas pa sa sako, kadudahan sab kon makalingkawas ba kay di man siyang kamao nga molangoy. Ang iya intawong mga ginikanan igo na lang sa pagminatay. Kay gidid-an pa man gani sila pag-ugkat sa patayng lawas, nga nangalisbo nag nadugta, aron unta mada pagbalik sa Asturias. Gihikawan sa kahigayonan pag-atiman sa lawas iyawat na lang mabawi ang tanan nilang pagkuwang sa bata.

* * *

Bisan pag madawat nang hinabang nga gisaad ni Gobernador Gwen Garcia, nga gipakapinan og tulisok batok sa mayor sa Asturias nga wa pa mo-amen sa Kapitolyo, di matapakan ang haw-ang nga namugna sa trahedya.

Matag karon ug unya, mga panghitabo nga ingon ini mokuhit sa atong tanlag, mopukaw sa pagpakabana nga gusto na lang unta natong hingpit nga pakatulgon.

* * *

Email: [email protected]