Utok sa vigilantes

Kinsa man ang utok sa sunud-sunod nga pagpamatay sa vigilantes sa dul-an na sa 200 ka gidudahang mga kriminal sa Sugbo? Lisod nang tubagon. Bisan ang Commission on Human Rights (CHR) nga maisugong nipadayag og pagduda nga mga opisyal ra sab sa gobyerno ang nagpasiugda sa laktod nga pagpamatay di lang sa suspitsadong mga kriminal kon dili apil na sa mga sakop sa walhong mga grupo niangkon nga wa silay klarong mga ebidensiya tungod sa pagtalaw sa mga saksi pagmatuod sa pasangil.

Apan kon imong susihon kinsay ilang mga biktima (164 na ang nahagba sa kataposang ihap), makaangkon ka og ideya kinsa ang tawo o mga tawo nga nagpalihok sa vigilantes. Kay lisod tuohan nga nagkadungan lang sila pagbatyag og talagsaong paghigugma sa hustisya, kaluoy sa mga biktima sa kriminalidad, kayugot sa mga kriminal ug nag-iyahay ra pagpamatay sa ilang mga target.

* * *

• Kasagaran sa mga biktima mga kabos. Kay di man mga kabos ray nakahimo og krimen, mahimong ang mga nagpalihok sa vigilantes nagtinguha lang pagpatigbabaw sa hustisya kon ang sad-an way nahot nga ikasukol nila;

• Kasagaran sa mga biktima "small time" nga mga tulisan, kawatan ug durugista. Sa ato pa, ang utok sa vigilantes way planong mobangga sa mas dagkong sindikato sa mga kriminal;

• Wa pay drug lord nga napahagba. Mahimo nga ang nagpakatap sa vigilantes kurog sa drug lords o nakadawat og amot gikan sa higanteng mga negosyo sa ilegal nga drugas;

• Wa pay smuggler nga naigo. Posible nga ang utok sa vigilantes wa mangambisyon pagukod sa mga nagsabotahe sa ekonomiya. Posible sang nakasapi sa dakong kuwarta sa payuhot sa atong mga pantalan ug tugpahanan;

* * *

• Wa pay gambling lord nga natumba. Posibleng ang nagpalihok sa vigilantes natagbaw pa sa sinemanang protection money gikan sa video carrera ug molimoli operators;

• Wa pay kurakot sa gobyerno nga natsambahan. Mahimong ang utok sa vigilantes maikugon nga opisyal sa gobyerno-di siyang kaako pag-unay sa iyang kaubanan sa serbisyo nga mga kukhan;

• Ang Tejero, Cebu City maoy labing daghan og biktima (15 nay napatay, tulo ang nasamdan). Nagpasabot nga labing menos usa sa nangu sa vigilantes suhito kaayo, posible ganing molupyo gyod, sa Tejero;

* * *

• Mayoriya sa mga biktima dunay criminal record. Ang nagpalihok sa vigilantes dunay direktang kasayuran sa mga kasong napasaka sa kapolisan ug nahusay sa mga hukmanan ug sa mga binilanggong nabalhog ug nakagawas sa BBRC ug ubang bilanggoan;

• Hangtod karon, kasagaran sa mga naigo sa vigilantes mga gikaintapan sa katilingban, pipila ray giisip nga mga buotan nga mahimong nasaypan lang. Sa ato pa, labing menos usa sa mga utok sa vigilantes politiko nga di gustong maduhig sa bulilyaso ug maibanan og mga boto.

* * *

Email: leo_lastimosa@abs-cbn.com