Bastos nga waldas

Morag duna gyoy sakit sa utok ang lokal nga mga opisyal sa St. Bernard, Southern Leyte, ang nahimutangan sa Barangay Guinsaugon nga napapas sa mapa tungod sa pagdahili sa usa ka bahin sa bukid sa Kan-abag tulo ka buwan nang nilabay. Human nasakpan nga (1) naglangay-langay paghatag sa hinabang ngadto sa mga biktima, (2) nagpataka pag-apud-apod sa relief goods ngadto sa kapolisan ug uban opisyal sa lungsod nga wa maapil sa katalagman, (3) naglangay-langay pagpatukod sa kabalayan nga kabalhinan sa mga bakwet ug (4) naglangay-langay pagpabalhin sa mga bakwet karong nahuman nang pipila ka kabalayan sa relocation site sa Barangay Magbagacay, naghimo na sab og laing pakauwaw.

Makapakugang nang daan ang nabistong pagasto og dakong kuwarta alang sa laag-laag sa mga pangu sa Sangguniang Kabataan (SK) sa ilang mga barangay, mas dakong eskandalo ang pagwaldas na sab og kuwarta alang sa laag-laag sa mga barangay kapitan. Gipamatud-an nilang Mayor Maria Lim ug kaubanan nga samtang nihit silag kuwarta ug katakos pagtabang sa mga biktima sa katalagman, abunda sila sa paugat pag-usik-usik sa kuwartang di ila.

* * *

Angayng pahalipayan ang Gawad Kalinga (GK) sa Couples for Christ sa paspas nilang pagtukod sa kabalayan sa Magbagacay alang sa mga molupyo nga nawad-an sa ilang pamilya ug tanang kabtangan sa Guinsaugon. Nakapait kay klarong si Mayor Lim way bilib nila.

Pila lang ka adlaw human gideklarar ang Magbagacay nga relocation site, ug tungod sa dakong pundo nga gitanyag ni Lucio Tan, ang tag-iya sa Philippine Airlines, andam nang GK pagsugod pagtukod sa kabalayan. Apan gibaraw silang Lim kay wa pa matarung pagbahin ang luna tali sa GK ug sa laing duha ka institusyon nga magtukod og kabalayan, ang Philippine National Red Cross (PNRC) ug ang gobyerno sa Estados Unidos. Mas mahinungdanon alang ni Lim ang paghapuhap sa PNRC ug sa mga Kano kay sa pagdali paghaw-as sa mga biktima gikan sa naghuot ug nangalisbo nang evacuation centers.

* * *

Dihang nahuman nang pasiunang kabalayan nga gitukod sa GK, nanglawgaw na sab si Lim. Gibabagan niyang sugyot sa mga haligi sa GK nga paunahon pagpabalhin ang pipila ka pamilya aron gawas nga makatikad na sa bag-o nilang katilingban makatabang na sab pagbantay sa kahimanan sa mga boluntaryo sa GK sa Magbagacay.

Bisan wa pang kapabarug og bisan usa ka haligi ang US ug PNRC, mas bilib gihapon si Lim sa pagarpar ni PNRC Chairman Richard Gordon kay sa aktuwal nga bunga sa kahago sa GK. Maayo na lang kay si Gobernador Rosette Lerias sa Southern Leyte, sa iyang pagduaw sa DYAB Abante Bisaya niadtong Lunes, nipahibawo nga may pipila na ka pamilya nga gitugotan makabalhin sa bag-o nilang mga pinuy-anan.

* * *

Email: [email protected]