Lawog sa tirong

Laing Sugbuanon ang namatay samtang nanarbaho sa gawas sa nasud. Sama sa naandan, wa mag-apura ang hingtungdang mga ahensiya pagpabalik sa iyang patayng lawas aron maatiman ug kahatagan og disenteng lubong sa iyang pamilya dinhi sa Sugbo. Mao ni bawos sa kagamhanan sa giilang bag-ong mga bayani sa atong panahon.

Si Sabas Baguio Jr., 51, seaman sa daghan nang katuigan, namatay niadtong Abril 29 sa Dubai. Ang nahibaw-an sa iyang pamilya sa Cordova mao nga, pila ka adlaw sa wa pa siya namatay, nagreklamo si Sabas nga nagsakit ang iyang dughan. Gikatahong gipatomar siyag valium ug gipapahuway. Gipahibawo ang iyang pamilya nga nasud siya sa intensive care unit (ICU) sa ospital niadtong Abril 30, o 24 oras na human siya namatay.

* * *

Niadtong Mayo 1, ang ahensiya nga nagpada ni Sabas, Maritime Services and Management Inc., nangayo sa pagtugot sa pamilya aron nga ma-autopsy ang patayng lawas. Apan hangtod sa akong pagsuwat ini, wa pa gihapon matakda kanus-a mapada ang patayng lawas kay niingon na sang ahensiya nga ipaubos pa sa "full autopsy."

Ang mga kapamilya ni Sabas, nga gipangulohan sa iyang asawa, si Amor, ug igsoon, si Judith Baguio delos Reyes, nidangop na sa Overseas Workers Welfare Administration (OWWA), Philippine Overseas Employment Administration (POEA) ug Department of Foreign Affairs (DFA). Sama sa naandan, ug di mabasol ang lokal nga mga ahensiya kay nag-agad ra man sab sila sa lihok sa atong welfare officer ug labor attache sa Dubai, igo lang silang gipapaabot ug gisaad-saaran kanus-a gyod makapauli ang patayng lawas.

* * *

Nganong kuwang man og kakugi ug pagpakabana ang mga opisyal sa atong mga embahada sa nagkalainlaing kanasuran alang sa OFWs? Tig-a ba lang silag kasingkasing, gikublan na ba lang gyod ang ilang mga tanlag, o wa lang gyoy luna sa ilang kahiladman ang makaluluoy nga mga anak sa singot?

Usa sa posibleng katin-awan mao ang pagtudlo nila base sa pamolitika di sa katakos pagtuman sa ilang mga gimbuhaton. Kasagaran nila kadugo o higala sa dagkong mga politiko nga maoy nagluklok nila sa katungdanan. Ang liderato ni Pres. Arroyo nga nagsalig sa iyang mga alyado aron makalingkawas sa lapad nga mga protesta pagpalagpot niya sa Malakanyang maoy nipuno sa burukrasya sa mga opisyal nga nag-apas lang sa suweldo ug makabuhong nga mga benepisyo.

* * *

Apan ang labing bug-at nga tulisok angayng ibundak sa nasudnong kagamhanan. Luyo sa ilang ulog-ulog sa OFWs mao ang ilang pagtila sa langyawng mga nasud.

Tungod sa dakong panginahanglan sa trabaho, andam nilang ilawog sa tirong ang OFWs bugti sa pagpatigbabaw sa maayo apan mini nga relasyon uban sa kanasuran nga tinubdan sa mga trabaho nga di nila mahatag ngadto sa katawhan.

* * *

Email: [email protected]