Anomaliya! Anomaliya!

Wala g'yoy aso nga makumkom. Nabulgar karon ang usa ka anomaliya sa among barangay Lorega-San Miguel. Ang among barangay secretary nga si Milagros "Mely" Merino ug ang barangay personnel nga si Edgar "Loloy" Nillas maoy gipasanginlan nga nakahimo og binuang.

Hinoon, kay naglambigit man kini og kaso nga kriminal, hatagan nato sila og higayon nga makatubag.

Daygon nako si Joan Enriquez, ang barangay employee nga maoy "whistleblower" kon maoy nagbutyag niining maong kahiwian sa among pinangga nga barangay.

Ang tinuod, dili g'yod unta ko gusto nga motuki niining maong isyu kay kauban ra nako sila nga taga Lorega-San Miguel. Apan ang katungdanan maoy nagdektar kanako nga tumanon ang akong tahas. Ingon niini ang estorya sa giingong anomaliya nga naglambigit nila ni Nillas ug Merino. Gituohan usab nga duna pay ubang mga opisyal ug kawani sa barangay nga nalambigit.

* * *

Sila si Nillas ug Merino gihatagan og pagtugot ni barangay treasurer Rolando Maloloy-on nga maoy makaisyu og resibo ngadto sa mga magbubuhis nga mobayad og buhis sa barangay. Atong klarohon nga may sipyat usab niini si treasurer Maloloy-on kay ang mga tawo nga iyang gitugyanan sa pagpangisyu og resibo dili "bonded" basi sa lagda nga gilatid sa Commission on Audit. Kon ang rason ni Maloloy-on sa paghatag niya og katungod nila ni Nillas ug Merino nga makapangisyu og resibo mao nga dili malangan ang mga magbubuhis, kay usahay wala man siya sa barangay, nagtudlo unta sila og laing "accountable officers."

Kaniadtong Enero 2, 2006 milukat og business clearance sa barangay sila si Arcadio A. Cortez ug Beverly Yu. Matag usa nila mibayad og tag P500 basi sa resibo nga giisyu kanila.

Apan dihang gisusi ni Joan Enriquez ang duplicate ug triplicate copies sa resibo, napasiga ang iyang mga mata kay P50 ra man ang nabutang didto, dili man P500 sigun sa nabayran nila ni Cortez ug Yu. Ang nakadugang pa g'yod sa binuang, ang resibo numero 4979372 nga giisyu kang Yu, lahi na og ngalan sa magbubuhis sa triplicate copy. Usa na ka Rachel Bernandeza.

Gidayeg nako si acting Deputy Ombudsman Virginia Palanca-Santiago kay personal gayod siya nga miadto sa Lorega-San Miguel kagahapon og mihimo sa fact-finding inquiry.

Nakapanglingo-lingo tawon si Santiago nga nagtan-aw sa mga pasiunang ebidensya ug sa mga palpak sa "fiscal management" sa barangay Lorega-San Miguel.

Nagtoo g'yod si Santiago nga gawas niining maong kaso, daghan pang susamang kaso nga naglambigit sa ubang taxpayers nga nabinuangan sa mga abusadong opisyal ug kawani sa Lorega-San Miguel. Buyno, tan-awon nato ang sangpotanan sa imbistigasyon. Sigurado ko nga paspas ang dagan sa imbistigasyon aning kasoha kay ang Ombudsman na mismo ang mangunay sa paghimo og pakisusi.

Dili na nila ipasa sa Commission on Audit ang paghimo og imbistigasyon.

Tan-aw nako aning anomaliya sa Lorega-San Miguel, duna g'yoy mga tawo nga karong pipila ka adlaw adto magtingkagol sa prisohan. Matag usa ka resibo nga nabinuangan, magkahulogan og usa ka kaso.

Kapin sa napulo ka booklets sa mga resibo - nga naglangkob sa duplicate ug triplicate copies - gidala sa Ombudsman aron himoan nila og pakisusi. Awhagon nako ang mga nakabayad nga tabangan nato ang Ombudsman sa paghimo og pakisusi.

Ipalihug og text nako ang inyong mga Official Receipts Numbers, ang ngalan sa giisyohan ug ang kantidad sa inyong gibayad. Kon tinuod nga nakahimo og salaod sila si Merino ug Nillas, angay sila nga manubag sa ilang nahimo.

Maayo unta og ang gihimo ni Joan Enriquez nga maoy nagsilbi nga "whistleblower" manakod unta sa ubang mga lumulopyo ug kawani sa ubang barangay nga motug-an sa mga binuang nga ilang mahibaw-an. Ang akong cellphone numbers alang niadtong mohatag nako og inpormasyon - 0917-3836645.