Kinsay sad-an?

Inay mohatag og kasayuran unsay gipadulngan sa minilyon ka pesos nga hinabang gikan sa nagkalainlaing kanasuran sa kalibotan, ang lokal nga mga opisyal sa Southern Leyte nagpakitabang na hinuon sa media pagsubay unsay mga hinabang nga gisaad, unsay nahatag na, unsay gigamitan ug unsay nadawat na sa mga biktima sa katalagman. Si Gobernador Rosette Lerias nikumpisal nga wa siyay kasayuran sa tanang hinabang alang sa St. Bernard ug ubang nagusbat nga mga lungsod sa iyang lalawigan.

Matod ni Lerias igo lang siyang gipahibawo sa National Disaster Coordinating Council (NDCC) nga kasagaran sa mga hinabang di kuwarta mao nga gihingpit pang plano unsaon ni pag-apud-apod ngadto sa mga biktima. Iyang gitumbok ang hinabang sa China nga pulos construction materials nga ilang gipanghinaot nga komprahon gikan sa lokal nga suppliers ug di gikan sa Beijing.

* * *

Dihang gisulti ning Lerias atol sa among pag-cover sa pagduaw ni Cebu Governor Gwen Garcia sa Kapitolyo sa Maasin sa niaging buwan, gipakaingon nakog nasobrahan rang iyang bilib sa media. Apan dihang gipasa-pasa mi sa kadagkoan sa NDCC nga among gipangitaan sa mga hinabang, ug dihang nihulga nang mga biktima sa Guinsaugon paglusad og protesta kon way makahatag nilag makatagbaw nga katin-awan, inanay kong nakumbinser nga silang Lerias ug ubang lokal nga mga opisyal nagpabaya sa ilang katungdanan.

Gusto kong motoo nga ang kapakyas nilang Lerias pagpangayo og husay pila ang kinatibuk-ang hinabang nga nadawat sa nasudnong gobyerno alang sa mga biktima sa katalagman sa Southern Leyte wa manukad sa katapolan ni sa kakuwang og kaluoy sa mga biktima, kon dili tungod sa kaikog. O sa mas matinud-anong pagkasulti: Kasipsip.

Tungod sa ilang kasipsip sa administrasyon, naikog silang Lerias ug kaubanan pagpaningil sa kadagkoan sa NDCC ug ubang ahensiya nga giduma sa kaubanan nilang mga itoy, kansang mga bulilyaso tinong makapalig-on sa sibawng mga pasangil nga kawatan ang pamunoan sa naapiki nilang amo nga si Pres. Arroyo.

* * *

Nahadlok kong ang kamaikugon sa mga sakop sa media, nga hangtod karon managana pag-apiki nila tungod sa kabangis sa katalagman nga nihasmag sa ilang katawhan, maoy gipahimuslan nilang Lerias pag-ikyas sa makauuwaw nilang kapakyas paghatag sa mga biktima sa labing batakang mga panginahanglan sa mga biktima.

Nga maoy among nahiagoman dihang among gibisto ang pagpangawat sa usa ka barangay kapitan ug sa kapolisan sa St. Bernard sa relief goods gikan sa mga Sugbuanon ug sa Kapamilya Relief Campaign sa DYAB Abante Bisaya ug ABS-CBN Cebu. Inay ipatin-aw nganong gipasagdan lang ang mga kawat, igo lang ming giingnan nga way makaandam ni bisan kinsa sa maong katalagman.

Ang kamakaluluoy sa mga biktima angayng untang modasig inay mobadlong sa matinud-anong pagsusi unsay papel nilang Lerias ug ubang opisyal pag-upaw sa kabukiran ug pagbantang sa inosenteng mga molupyo sa panimawos sa kinaiyahan?

* * *

Email: leo_lastimosa@abs-cbn.com