Yabag nga Cha-Cha

Ang pagkolekta og pirma alang sa kausaban sa konstitusyon maoy labing bantang nga tilimad-on sa pagsurender sa Malakanyang sa pagpamugos sa mga senador pagsayaw sa cha-cha (charter change). Kini tungod kay ang liderato ni Senate President Franklin Drilon mas nilig-on, inay mohuyang, bisan sa higpit nga pagpanggukod sa administrasyon human siya mobarug pag-awhag sa resignasyon ni Pres. Arroyo.

Tinuod nga ang pagkonsulta sa katawhan lig-on nga haligi sa demokrasya. Apan di makiangayon kon diretsuhon silag papirma sa pangutana nga wa itarung pagpasabot nila. Labi na kon idungan sa uban pang kontrobersiya sa barangay. Way kalainan sa binuang sa diktadurang Marcos tulo ka dekada nang nilabay pagpangutana sa mga molupyo kon kinsay nagkinahanglan og bugas ug paglista sa mga nipataas og kamot nga pabor sa kausaban sa konstitusyon.

* * *

Magpabilin ang mga kasong kriminal nga giatubang ni Dr. Jose Sal Tan bisan pa kon matangtang na siya pagka presidente sa Cebu State College of Science and Technology (CSCST). Matod ni Deputy Ombudsman Virginia Palanca-Santiago magpadayon ang ilang imbestigasyon sa mga pasangil sa pangurakot batok nilang Tan ug kaubanan bisan sa taho nga pulihan na si Tan karong Abril 1.

Si Dr. Ester Velasquez, presidente sa Cebu Normal University (CNU), maoy kasamtangang mopuli ni Tan samtang gipangita pang sunod nga tagduma sa CSCST. Ang pagsud sa taga gawas dakong sagpa sa grupo ni Tan nga gipasanginlang daghan pa og giplanong pagpahimus labi na kon dasonan sa Kongreso ang ilang sugyot paghimong unibersidad sa CSCST.

Matod ni Santiago ang mga kasong administratiba ray mabasura inigkatangtang ni Tan kay di na man siya matangtang ni masuspenso sa katungdanan.

* * *

Hangtod karon nagpadayon pagpabaga pagpabilin si Heneral Adelberto Yap isip general manager sa Mactan-Cebu International Airport Authority (MCIAA) bisan gideklarar na siyang di qualified sa katungdanan. Ang Civil Service Commission (CSC) nitataw nga angayng pulihan si Yap sa usa sa laing duha ka aplikante nga naghupot sa gikinahanglang eligibility.

Ang CSC nagsusi na karon kinsay responsable sa pagpalsipikar sa kopya sa charter sa MCIAA nga maoy gibasehan sa ilang pagtugot ni Yap pagpabilin sa katungdanan. Gipasidan-an sab sa CSC si Yap sa di na pagkobra sa iyang suholan ug mga benepisyo ug ang MCIAA board sa dili pagpamugos sa reappointment ni Yap.

* * *

Duna sab karoy nag-ung-ong nga kaso sa Visayas Ombudsman batok sa tanang sakop sa MCIAA board tungod sa ilang pagpaugat pagtudlo ni Yap bisan kon nahibawo silang di siya qualified ug bisan napaso na sila sa susamang kontrobersiya dihang ila sang gipamugos ang pagtudlo sa otro-sang-di-qualified nga si Angel Verdan.

Lisod bang pangayuon nga maghupot silang Yap ug MCIAA board og gamayng kaikog sa mga Sugbuanon pinaagi sa pagpangayog pasaylo sa ilang bantang nga pagyatak sa balaod?

* * *

Email: [email protected]